ભારતે ત્રીજી વખત T20 વર્લ્ડ કપનું ટાઇટલ જીતી લીધું છે. અમદાવાદમાં રમાયેલી ફાઈનલમાં ટીમ ઈન્ડિયાએ ન્યૂઝીલેન્ડને 96 રનથી હરાવ્યું. ટોસ હારીને પ્રથમ બેટિંગ કરતા ભારતે 5 વિકેટે 255 રન બનાવ્યા, ન્યૂઝીલેન્ડની ટીમ 159 રન પર ઓલઆઉટ થઈ ગઈ. આ જીત સાથે ભારતે ત્રણ વર્ષમાં ત્રીજી ICC ટ્રોફી પોતાના નામે કરી લીધી. સાથે જ ટીમ ઈન્ડિયા T20 વર્લ્ડ કપના એક એડિશનમાં 100થી વધુ છગ્ગા લગાવનારી પ્રથમ ટીમ બની, જ્યારે સંજુ સેમસને ટૂર્નામેન્ટના એક એડિશનમાં ભારત માટે સૌથી વધુ રન બનાવીને વિરાટ કોહલીનો રેકોર્ડ પણ તોડી નાખ્યો. વાંચો IND vs NZ ફાઈનલના ટૉપ રેકોર્ડ્સ… 1. ભારતે 3 વર્ષમાં 2 T20 વર્લ્ડ કપ અને એક ચેમ્પિયન્સ ટ્રોફી જીતી ભારતે માત્ર ત્રણ વર્ષમાં ત્રણ ICC ટ્રોફી જીતી લીધી. ટીમે 2024માં T20 વર્લ્ડ કપ જીતીને 17 વર્ષ પછી આ ખિતાબ મેળવ્યો. ત્યારબાદ 2025માં ચેમ્પિયન્સ ટ્રોફી જીતીને જીતની લય જાળવી રાખી અને હવે 2026માં T20 વર્લ્ડ કપ જીતીને ભારતે ત્રણ વર્ષમાં ત્રીજી ICC ટ્રોફી હાંસલ કરી લીધી. T20 વર્લ્ડ કપ ફાઈનલમાં બે-બે વાર હારનાર ટીમમાં પાકિસ્તાન, શ્રીલંકા અને ન્યૂઝીલેન્ડનો સમાવેશ થાય છે. પાકિસ્તાન 2007 અને 2022માં, શ્રીલંકા 2009 અને 2012માં, જ્યારે ન્યૂઝીલેન્ડ 2021 અને 2026માં ફાઈનલ હારી ચૂક્યું છે. 2. ભારત 3 T20 વર્લ્ડ કપ જીતનાર પ્રથમ દેશ ભારતે T20 વર્લ્ડ કપના ઇતિહાસમાં નવો અધ્યાય લખ્યો. ટીમ ઈન્ડિયા 2024 પછી 2026માં પણ ચેમ્પિયન બની અને T20 વર્લ્ડ કપનું ટાઇટલ ડિફેન્ડ કરનારી પ્રથમ ટીમ બની. આ સાથે જ ભારત ત્રણ T20 વર્લ્ડ કપ (2007, 2024 અને 2026) જીતનારી દુનિયાની પ્રથમ ટીમ પણ બની ગયું. અમદાવાદમાં રમાયેલી ફાઈનલમાં જીત સાથે ભારતે પહેલીવાર પોતાના ઘરઆંગણે T20 વર્લ્ડ કપ ટ્રોફી પણ જીતી. આ પહેલા ટીમે 2007માં સાઉથ આફ્રિકા અને 2024માં વેસ્ટ ઇન્ડીઝમાં ખિતાબ જીત્યો હતો. હવે ભારતના નામે ત્રણ T20 વર્લ્ડ કપ ટ્રોફી થઈ ગઈ છે, જ્યારે વેસ્ટ ઇન્ડીઝ અને ઇંગ્લેન્ડ બે-બે વાર જ આ ખિતાબ જીતી શક્યા છે. 3. ભારત એક T20 વર્લ્ડ કપમાં 100+ છગ્ગા ફટકારનારી પ્રથમ ટીમ ભારત એક T20 વર્લ્ડ કપમાં 100થી વધુ છગ્ગા ફટકારનારી પ્રથમ ટીમ બની ગઈ. ટીમે આખી ટુર્નામેન્ટમાં 106 છગ્ગા ફટકાર્યા. આ રેકોર્ડમાં બીજા નંબરે વેસ્ટ ઈન્ડિઝ છે, જેણે 2026માં જ 76 છગ્ગા ફટકાર્યા. 4. ભારતે T20 વર્લ્ડ કપમાં સૌથી વધુ વખત 200+નો સ્કોર બનાવ્યો ભારત T20 વર્લ્ડ કપના ઇતિહાસમાં સૌથી વધુ વખત 200+નો સ્કોર બનાવનારી ટીમ બની ગઈ. ટીમ ઈન્ડિયાએ અત્યાર સુધીમાં સાત વખત 200+ રન બનાવ્યા છે. આ રેકોર્ડમાં સાઉથ આફ્રિકા 6 વખત 200+ સ્કોર સાથે બીજા સ્થાને છે, જ્યારે વેસ્ટ ઈન્ડિઝ, શ્રીલંકા અને ઇંગ્લેન્ડ 4-4 વખત આ આંકડો પાર કરી ચૂક્યા છે. T20 ક્રિકેટમાં સૌથી વધુ 250+ સ્કોર બનાવવાની બાબતમાં પણ ભારત ટોચ પર છે. ટીમ ઈન્ડિયા અત્યાર સુધી સાત વખત 250થી વધુનો સ્કોર બનાવી ચૂકી છે. આ રેકોર્ડમાં IPL ટીમ સનરાઇઝર્સ હૈદરાબાદ 5 વખત 250+ સ્કોર સાથે બીજા નંબર પર છે. ભારતે 2026માં ચાર વખત 250+ સ્કોર બનાવ્યો, જે કોઈપણ ટીમ દ્વારા એક વર્ષમાં સૌથી વધુ છે. 5. ભારતે T20 વર્લ્ડ કપ ફાઈનલનો સૌથી મોટો સ્કોર બનાવ્યો અમદાવાદમાં રમાયેલી 2026 T20 વર્લ્ડ કપ ફાઈનલમાં ભારતે 255 રનનો વિશાળ સ્કોર બનાવ્યો. આ T20 વર્લ્ડ કપ ફાઈનલના ઇતિહાસનો સૌથી મોટો સ્કોર છે. બીજું સ્થાન પણ ભારતના નામે છે, જેણે 2024ની ફાઈનલમાં દક્ષિણ આફ્રિકા સામે 176 રન બનાવ્યા હતા. આ પછી 2021ની ફાઈનલમાં ન્યૂઝીલેન્ડનો 172/4 અને 2007ની ફાઈનલમાં ભારતનો 157/5 સ્કોર સામેલ છે. 6. ભારતે પાવરપ્લેમાં સૌથી મોટા સ્કોરની બરાબરી કરી ભારતે 2026ની ફાઈનલમાં પાવરપ્લેના 6 ઓવરમાં 92 રન બનાવ્યા, જે T20 વર્લ્ડ કપ ઇતિહાસનો સૌથી મોટો પાવરપ્લે સ્કોર છે. આ રેકોર્ડમાં બીજું સ્થાન પણ 92 રનનું છે, જે વેસ્ટ ઇન્ડીઝે 2024માં અફઘાનિસ્તાન સામે બનાવ્યું હતું. આ પછી નેધરલેન્ડ્સનો 91/1 અને ઇંગ્લેન્ડનો 89/3 સ્કોર આવે છે. 7. ભારતની સૌથી મોટી T20 વર્લ્ડ કપ જીત ભારતે 2026ની ફાઈનલમાં ન્યૂઝીલેન્ડને 96 રનથી હરાવ્યું, જે T20 વર્લ્ડ કપ ઇતિહાસમાં ભારતની સૌથી મોટી જીત છે. આ પહેલા ભારતની સૌથી મોટી જીત 2026માં જ નામિબિયા સામે 93 રનની હતી, જ્યારે 2012માં ઇંગ્લેન્ડ સામે ટીમે 90 રનથી જીત નોંધાવી હતી. 8. સંજુની ફાઈનલમાં સૌથી મોટી ઇનિંગ્સ સંજુ સેમસને 2026 T20 વર્લ્ડ કપ ફાઈનલમાં 89 રનની ઇનિંગ્સ રમી હતી, જે T20 વર્લ્ડ કપ ફાઈનલ ઇતિહાસની સૌથી મોટી વ્યક્તિગત ઇનિંગ્સ છે. આ પહેલા વેસ્ટ ઇન્ડીઝના માર્લન સેમ્યુઅલ્સે 2016ની ફાઈનલમાં અણનમ 85 અને ન્યૂઝીલેન્ડના કેન વિલિયમસને 2021ની ફાઈનલમાં 85 રન બનાવ્યા હતા. 9. ભારતે ફાઈનલમાં સૌથી વધુ સિક્સર ફટકારી ભારતે ફાઈનલમાં 18 છગ્ગા ફટકાર્યા, જે ફાઈનલમાં કોઈપણ ટીમ દ્વારા ફટકારવામાં આવેલા સૌથી વધુ છગ્ગામાં સામેલ છે. આ જ મેચમાં ભારતે કુલ 37 બાઉન્ડરી ફટકારી, જે T20 વર્લ્ડ કપના ઇતિહાસમાં કોઈપણ ટીમ દ્વારા એક ઇનિંગ્સમાં સૌથી વધુ બાઉન્ડ્રી ફટકારવાના રેકોર્ડ્સમાં સામેલ છે. 10. ભારત વર્લ્ડ કપ નોકઆઉટમાં સૌથી ઝડપી ટીમ સદી ફટકારનારી ટીમ ભારતે 2026ની ફાઈનલમાં માત્ર 7.2 ઓવરમાં 100 રન પૂરા કર્યા. આ T20 વર્લ્ડ કપ નોકઆઉટ (સેમિફાઈનલ+ફાઈનલ) મેચોમાં સૌથી ઝડપી ટીમ સદી છે. આ રેકોર્ડમાં બીજા સ્થાને ન્યૂઝીલેન્ડ છે, જેણે 2026માં સાઉથ આફ્રિકા સામે 7.5 ઓવરમાં 100 રન બનાવ્યા હતા. 11. બુમરાહ T-20 વર્લ્ડ કપમાં સૌથી વધુ વિકેટ લેનાર ફાસ્ટ બોલર જસપ્રીત બુમરાહ T-20 વર્લ્ડ કપના ઇતિહાસમાં સૌથી વધુ વિકેટ લેનાર ફાસ્ટ બોલર બની ગયા છે. તેમના નામે 40 વિકેટ છે. આ રેકોર્ડમાં શ્રીલંકાના લસિથ મલિંગા અને સાઉથ આફ્રિકાના એનરિક નોર્કિયા 38-38 વિકેટ સાથે બીજા સ્થાને છે, જ્યારે ભારતના અર્શદીપ સિંહ અને ન્યૂઝીલેન્ડના ટિમ સાઉથી 36-36 વિકેટ સાથે પછીના સ્થાને છે. 12. બુમરાહનું T20 વર્લ્ડ કપ ફાઈનલમાં બીજું શ્રેષ્ઠ પ્રદર્શન અમદાવાદમાં રમાયેલી 2026 T20 વર્લ્ડ કપ ફાઈનલમાં જસપ્રીત બુમરાહે 4 વિકેટ લેવા માટે માત્ર 15 રન આપ્યા હતા. આ T20 વર્લ્ડ કપ ફાઈનલના ઇતિહાસની બીજી શ્રેષ્ઠ બોલિંગ પ્રદર્શન છે. આ રેકોર્ડમાં પ્રથમ સ્થાન શ્રીલંકાના અજંથા મેન્ડિસના નામે છે, જેમણે 2012ની ફાઈનલમાં 4/12નો પ્રદર્શન કર્યો હતો. ત્યારબાદ ત્રીજા સ્થાને વેસ્ટ ઇન્ડીઝના સુનીલ નારાયણ (3/9), ચોથા સ્થાને ઇંગ્લેન્ડના સેમ કરન (3/12) અને પાંચમા સ્થાને ભારતના ઇરફાન પઠાણ (3/16) છે. 13. સંજુએ કોહલીનો રેકોર્ડ તોડ્યો 2026 T20 વર્લ્ડ કપમાં ભારતીય વિકેટકીપર બેટર સંજુ સેમસને 321 રન બનાવ્યા. આ કોઈ ભારતીય ખેલાડી દ્વારા એક T20 વર્લ્ડ કપ એડિશનમાં બનાવેલા સૌથી વધુ રન છે. આ પહેલા આ રેકોર્ડ વિરાટ કોહલીના નામે હતો, જેમણે 2014માં 319 રન બનાવ્યા હતા. આ રેકોર્ડમાં 2026 ટુર્નામેન્ટમાં પાકિસ્તાનના સાહિબઝાદા ફરહાન 383 રન સાથે ટોચ પર રહ્યા, જ્યારે ન્યૂઝીલેન્ડના ટિમ સાયફર્ટે 326 રન સાથે બીજું સ્થાન મેળવ્યું. 14. સંજુ એક T20 વર્લ્ડ કપમાં સતત 3 ફિફ્ટી ફટકારનાર પ્રથમ ભારતીય સંજુ સેમસને 2026 T20 વર્લ્ડ કપમાં સતત ત્રણ ઇનિંગ્સમાં 80થી વધુ રન બનાવ્યા. તેઓ એક જ વર્લ્ડ કપ એડિશનમાં સતત ત્રણ અડધી સદી ફટકારનાર પ્રથમ ભારતીય બેટર બન્યો. T20 વર્લ્ડ કપના ઇતિહાસમાં આ સિદ્ધિ આ પહેલા મહેલા જયવર્દને, વિરાટ કોહલી, બાબર આઝમ, કેએલ રાહુલ અને કુસલ મેન્ડિસે હાંસલ કરી છે. હવે સંજુ સેમસન પણ આ રેકોર્ડમાં સામેલ થઈ ગયા છે. સેમસને સેમિફાઈનલ અને ફાઈનલ બંને મેચોમાં અડધી સદી ફટકારી. આવું કરનાર તેઓ T20 વર્લ્ડ કપના ઇતિહાસના ચોથા ખેલાડી બન્યા. તેમની પહેલા શાહિદ આફ્રિદી (2009), વિરાટ કોહલી (2014) અને ટિમ સાઇફર્ટે (2026) આ કારનામું કર્યું છે. 15. સંજુ એક T20 વર્લ્ડ કપમાં સૌથી વધુ સિક્સર ફટકારનાર બેટર સંજુ સેમસને 2026 T20 વર્લ્ડ કપમાં કુલ 24 છગ્ગા ફટકાર્યા, જે કોઈપણ ખેલાડી દ્વારા એક વર્લ્ડ કપ એડિશનમાં ફટકારવામાં આવેલા સૌથી વધુ છગ્ગા છે. તેણે ન્યૂઝીલેન્ડના ફિન એલનના 20 છગ્ગાનો રેકોર્ડ તોડી નાખ્યો. આ રેકોર્ડમાં વેસ્ટ ઈન્ડિઝના શિમરોન હેટમાયર 19 છગ્ગા સાથે ત્રીજા સ્થાને છે. પાકિસ્તાનના સાહિબઝાદા ફરહાન અને ભારતના ઈશાન કિશન 18-18 છગ્ગા સાથે સંયુક્ત રીતે આગલા સ્થાને છે. 16. સંજુ-અભિષેકે ફાઈનલમાં સૌથી મોટી ભાગીદારી કરી 2026ની ફાઈનલમાં ભારતના ઓપનિંગ બેટ્સમેન સંજુ સેમસન અને અભિષેક શર્માએ 98 રનની ભાગીદારી કરી. આ T20 વર્લ્ડ કપ ફાઈનલ ઇતિહાસની સૌથી મોટી ઓપનિંગ પાર્ટનરશિપ છે. આ પહેલા 2009ની ફાઈનલમાં પાકિસ્તાનના કામરાન અકમલ અને શહઝૈબ હસને શ્રીલંકા સામે 48 રનની ભાગીદારી કરી હતી, જ્યારે 2022ની ફાઈનલમાં પાકિસ્તાનના બાબર આઝમ અને મોહમ્મદ રિઝવાને ઇંગ્લેન્ડ સામે 29 રન જોડ્યા હતા. 17. અભિષેકે ત્રીજી સૌથી ઝડપી ફિફ્ટી ફટકારી અભિષેક શર્માએ 2026 T20 વર્લ્ડ કપ ફાઈનલમાં માત્ર 18 બોલમાં અર્ધશતક પૂરું કર્યું. આ ભારત માટે T20 વર્લ્ડ કપમાં ત્રીજી સૌથી ઝડપી ફિફ્ટી છે. આ યાદીમાં પ્રથમ સ્થાન યુવરાજ સિંહના નામે છે, જેમણે 2007માં ઇંગ્લેન્ડ સામે 12 બોલમાં ફિફ્ટી ફટકારી હતી. બીજા સ્થાને કેએલ રાહુલ છે, જેમણે 2021માં 18 બોલમાં અર્ધશતક બનાવ્યું હતું. 18. ગૌતમ ગંભીર આજ સુધી ફાઈનલ હાર્યા નથી ગૌતમ ગંભીરનો ફાઈનલ મેચોમાં રેકોર્ડ ખૂબ જ શાનદાર રહ્યો છે. તેમણે 2007 T20 વર્લ્ડ કપ ફાઈનલમાં પાકિસ્તાન સામે 75 રન બનાવ્યા અને ભારતને ચેમ્પિયન બનાવવામાં મહત્વની ભૂમિકા ભજવી. ત્યારબાદ 2011 વનડે વર્લ્ડ કપ ફાઈનલમાં શ્રીલંકા સામે 97 રનની મહત્વપૂર્ણ ઇનિંગ રમી, જેણે ભારતની જીતનો પાયો નાખ્યો. કોચ બન્યા પછી પણ તેમનો આ સિલસિલો ચાલુ રહ્યો અને તેમની કોચિંગ હેઠળ ભારતે 2025 ચેમ્પિયન્સ ટ્રોફી અને 2026 T20 વર્લ્ડ કપ જીત્યો. IPLમાં પણ તેઓ સફળ કેપ્ટન અને મેન્ટર રહ્યા છે. તેમણે 2012 અને 2014માં કોલકાતા નાઈટ રાઈડર્સને કેપ્ટન તરીકે ખિતાબ અપાવ્યો, જ્યારે 2024માં મેન્ટર તરીકે ટીમને ત્રીજી વખત ચેમ્પિયન બનાવી. આ રીતે ખેલાડી, કેપ્ટન અને કોચ તરીકે ગંભીરનો રેકોર્ડ દર્શાવે છે કે તેઓ મોટા ફાઈનલ મુકાબલાઓમાં અત્યાર સુધી ક્યારેય હાર્યા નથી. ——————————– T20 ફાઈનલ સંબંધિત આ સમાચાર પણ વાંચો… T20 વર્લ્ડ કપમાં આ ગુજરાતીઓએ ડંકો વગાડ્યો: બુમરાહ-અક્ષર-હાર્દિક સાથે બેટિંગ કોચ સિતાંશુ પણ ભારતના હીરો રહ્યા, જાણો તેઓએ કઈ રીતે ભારતને ચેમ્પિયન બનાવ્યું આ ઈન્ડિયન ક્રિકેટ ટીમને ચેમ્પિયન બનાવનાર ગુજ્જુઓની ચોકડી છે. જી હા, આપણે વાત કરી રહ્યા છીએ જસપ્રીત બુમરાહ, અક્ષર પટેલ, હાર્દિક પંડ્યા અને બેટિંગ કોચ સિતાંશુ કોટકની. સંપૂર્ણ સમાચાર વાંચો…