ભારતના 61% હવાઈ મુસાફરો માને છે કે ઇન્ડિગો એરલાઇન પર લાદવામાં આવેલો ₹22.20 કરોડનો દંડ અને તેની સામે કરવામાં આવેલી કાર્યવાહી પૂરતી નથી. લોકલસર્કલ્સના એક સર્વે મુજબ, મુસાફરોનું માનવું છે કે આ સજા તેમણે ભોગવેલી માનસિક અને આર્થિક પરેશાનીની સરખામણીમાં કંઈ જ નથી. 3 થી 5 ડિસેમ્બર, 2025ની વચ્ચે નવા નિયમોને કારણે ઇન્ડિગોની 2507 ફ્લાઇટ્સ રદ થઈ હતી અને 1852 ફ્લાઇટ્સ મોડી પડી હતી. આ કારણે 3 લાખથી વધુ મુસાફરોને મુશ્કેલી પડી હતી. આ પછી, ડાયરેક્ટોરેટ જનરલ ઑફ સિવિલ એવિએશન (DGCA)એ ઇન્ડિગો પર ₹22.20 કરોડનો દંડ ફટકાર્યો હતો. આવી ઘટનાઓ રોકવા માટે કાર્યવાહી પૂરતી નથી કાર્યવાહી પછી થયેલા સર્વેમાં 292 જિલ્લાના 31,000 થી વધુ હવાઈ મુસાફરોએ ભાગ લીધો હતો. પ્રવાસીઓએ જણાવ્યું કે આ નાની પેનલ્ટી ભવિષ્યમાં આવી ઘટનાઓ રોકવા માટે પૂરતી નથી. જોકે, 21% લોકોએ કાર્યવાહીને સંપૂર્ણપણે યોગ્ય ગણાવી હતી અને 18% લોકોએ કોઈ સ્પષ્ટ જવાબ આપ્યો ન હતો. આ ઉપરાંત, સર્વેમાં સામેલ ઘણા મુસાફરોએ આરોપ લગાવ્યો કે ફ્લાઇટ રદ થયા પછી, ઇન્ડિગોએ તેમને કાયદેસર રીતે મળવાપાત્ર રોકડ રિફંડ આપવાને બદલે ટ્રાવેલ વાઉચર પકડાવી દીધા. ઇન્ડિગોએ 68 દિવસ સુધી નિયમોનું પાલન ન કર્યું દંડ એરક્રાફ્ટ રૂલ્સ, 1937ના રૂલ 133A હેઠળ લગાવવામાં આવ્યો છે. આ હેઠળ કુલ દંડ ₹1.80 કરોડ છે, પરંતુ FDTL નિયમોનું 68 દિવસ સુધી પાલન ન કરવા બદલ દરરોજ ₹30 લાખનો દંડ લગાવવામાં આવ્યો. જેની રકમ ₹20.40 કરોડ છે. આ રીતે કુલ દંડ ₹22.20 કરોડ થયો. ઇન્ડિગોએ કહ્યું છે કે તે DGCAના તમામ આદેશોનું સંપૂર્ણ પાલન કરશે. જે પણ જરૂરી સુધારા હશે, તે સમયસર કરવામાં આવશે. કંપનીના બોર્ડ અને મેનેજમેન્ટનું કહેવું છે કે તાજેતરની ઘટના પછી કામ કરવાની રીતો, સિસ્ટમ અને સંચાલનને મજબૂત બનાવવા માટે આંતરિક રીતે સંપૂર્ણ તપાસ અને સમીક્ષા કરવામાં આવી રહી છે.