આગામી સ્થાનિક સ્વરાજ્યની ચૂંટણીઓને લઈને ગુજરાત પ્રદેશ ભાજપની સેન્ટ્રલ ઇલેક્શન કમિટી (CEC) ની મહત્વની બેઠક આજે પૂર્ણ થઈ છે. આ બેઠકમાં ચૂંટણીની રણનીતિની સાથે ઉમેદવાર પસંદગીના અત્યંત કડક ક્રાઇટેરિયા નક્કી કરવામાં આવ્યા છે. ભાજપે સંગઠનને મજબૂત કરવા અને નવા ચહેરાઓને તક આપવા માટે ‘નો રિપીટ’ થીયરી જેવો જ આકરો અભિગમ અપનાવ્યો છે.

આ નેતાઓને નહીં મળે ટિકિટ: નવા નિયમો જાહેર

બેઠકમાં લેવાયેલા સૌથી મોટા નિર્ણય મુજબ, હવે સંગઠનના હોદ્દેદારો ચૂંટણી લડી શકશે નહીં. વોર્ડ પ્રમુખ અને જિલ્લા પ્રમુખો ઉમેદવારી કરી શકશે નહીં, જેથી તેઓ સંગઠનલક્ષી કામગીરી પર ધ્યાન આપી શકે. આ ઉપરાંત, પક્ષે વયમર્યાદા પણ નક્કી કરી છે; 60 વર્ષથી વધુ ઉંમરના વ્યક્તિને ટિકિટ આપવામાં આવશે નહીં. સાથે જ, જે નેતાઓ સતત 3 ટર્મ સુધી ચૂંટણી લડ્યા છે, તેમને પણ આ વખતે ઘરે બેસવાનો વારો આવશે.

વર્ષો જૂના કાર્યકરોને મળશે પ્રાધાન્ય

ભાજપના નેતૃત્વએ સ્પષ્ટ કર્યું છે કે ટિકિટ વિતરણમાં વર્ષોથી પક્ષ માટે લોહી-પરસેવો વહાવનારા નિષ્ઠાવાન કાર્યકરોને લક્ષ્યમાં લેવામાં આવશે. પક્ષનો મુખ્ય હેતુ સંગઠનમાં રહેલા પાયાના કાર્યકરોને સત્તામાં ભાગીદારી આપવાનો છે. બેઠકમાં ઉમેદવાર પસંદગી ઉપરાંત આગામી દિવસોમાં ચૂંટણીલક્ષી લોકસંપર્ક અને પેજ સમિતિને વધુ સક્રિય કરવા મુદ્દે પણ વિસ્તૃત ચર્ચા કરવામાં આવી હતી. ભાજપના આ ‘શુદ્ધિકરણ’ અભિગમથી અનેક દિગ્ગજ નેતાઓમાં ફફડાટ વ્યાપી ગયો છે.