સુનીલ શેટ્ટીનો દીકરો અને બોલિવૂડ એક્ટર અહાન શેટ્ટી ‘બોર્ડર 2’ ની મોટી સફળતાનો આનંદ માણી રહ્યો છે. હવે તેણે કરિયરમાં એક વધુ મોટું પગલું આગળ વધ્યું છે. અનુરાગ સિંહ ડિરેક્ટેડ ‘બોર્ડર 2’ એ બોક્સ ઓફિસ પર શાનદાર કમાણી કરી છે અને દર્શકોનો ભરપૂર પ્રેમ મેળવ્યો છે. આ ફિલ્મમાં અહાનની એક્ટિંગને વિશેષ રૂપે વખાણવામાં આવી રહી છે, જેના કારણે તેની માંગ વધુ વધી ગઈ છે.

‘બોર્ડર 2’ માં અહાન શેટ્ટીએ લેફ્ટનન્ટ કમાન્ડર એમએસ રાવતની ભૂમિકા ભજવી છે.

હવે અહાન શેટ્ટીએ જાણીતા ડિરેક્ટર શાદ અલી સાથે તેની આગામી ફિલ્મ સાઈન કરી લીધી છે. આ ફિલ્મ એક રોમેન્ટિક ડ્રામા હશે, જેમાં અહાન પોતાને એક અલગ પ્રકારના પાત્રમાં રજૂ કરશે. શાદ અલીએ ‘સાથિયા’, ‘બંટી ઔર બબલી’ અને ‘ઝૂમ બરાબર ઝૂમ’ જેવી ઘણી ફિલ્મોનું ડિરેક્શન કર્યું છે.

શાદ અલીએ ‘સાથિયા’, ‘બંટી ઔર બબલી’ સહિતની ફિલ્મોનું ડિરેક્શન કર્યું છે.

અહાને આ નવા પ્રોજેક્ટ વિશે ‘મિડ-ડે’ને આપેલા ઇન્ટરવ્યુમાં કહ્યું છે કે, આ ફિલ્મ એક ઇન્ટેન્સ એક્શન-લવ સ્ટોરી હશે, જે તેણે 2021ની ફિલ્મ ‘તડપ’ પછી આગળ વધવા માટે પસંદ કરી છે. તે જણાવે છે કે, એવા પાત્રો જેમાં ભાવના અને ઊંડાણ હોય છે, તેમને ભજવવા તેને ગમે છે અને તે આ ફિલ્મનો ભાગ બનવાને લઈને ઉત્સાહિત છે.

અહાન શેટ્ટીએ 2021માં ‘તડપ’ ફિલ્મથી બોલિવૂડમાં ડેબ્યૂ કર્યું હતું, જેમાં તારા સુતારિયા તેની સાથે લીડ રોલમાં હતી.

સૂત્રોનું માનીએ તો, ફિલ્મનું નામ હજુ નક્કી થયું નથી અને ફિલ્માંકનનું કામ આ વર્ષના ઉનાળા એટલે કે માર્ચ-એપ્રિલની આસપાસ શરૂ થવાની સંભાવના છે. પ્રોડક્શન ટીમ હાલમાં સ્ક્રિપ્ટ અને મ્યુઝિક પર કામ કરી રહી છે અને ટૂંક સમયમાં ફિલ્મમાં મુખ્ય એક્ટ્રેસ પસંદગીની પ્રક્રિયા પણ શરૂ થવાની છે.

અહાન શેટ્ટી બોલિવૂડ એક્ટર સુનીલ શેટ્ટીનો દીકરો છે.

આ પગલાને ઇન્ડસ્ટ્રીમાં અહાન માટે એક મજબૂત તક માનવામાં આવી રહી છે કે, તે ‘બોર્ડર 2’ની સફળતા પછી પોતાના અભિનયની વિવિધતા બતાવી શકે. શાદ અલી સાથેના તેના આ પહેલા કોલબ્રેશનને ચાહકો અને વિવેચકો બંનેની નજરથી જોવામાં આવી રહ્યો છે. અહાનની ફેન ફોલોઈંગ પહેલેથી જ મજબૂત છે અને હવે એ જોવું રસપ્રદ રહેશે કે, તે રોમેન્ટિક રોલમાં શું નવો રંગ બતાવે છે.