ઓસ્ટ્રેલિયન ઓપન 2026માં શુક્રવારે ટોપ સીડ આર્યના સબાલેન્કા, મેન્સના વર્લ્ડ નંબર-1 કાર્લોસ અલ્કારેઝ, ડેનિયલ મેદવેદેવ અને વિટોરિયા મ્બોકો ત્રીજા રાઉન્ડમાં જીતીને પ્રી ક્વાર્ટર ફાઇનલમાં પહોંચી ગયા છે.

સબાલેન્કાએ સખત સંઘર્ષ બાદ અનાસ્તાસિયા પોટાપોવાને હરાવીને ચોથા રાઉન્ડમાં પ્રવેશ કર્યો છે. સબાલેન્કાએ આ મેચ 7-6 (4), 7-6 (7) થી જીતી. હવે ચોથા રાઉન્ડ (પ્રી-ક્વાર્ટર ફાઇનલ)માં તેનો સામનો 19 વર્ષની ઉભરતી કેનેડિયન ખેલાડી વિટોરિયા મ્બોકો સાથે થશે, જેણે ક્લારા ટૌસનને હરાવીને પોતાના કરિયરનું સર્વશ્રેષ્ઠ પ્રદર્શન કર્યું છે.

બે ટાઈબ્રેકર સુધી ખેંચાઈ સબાલેન્કાની મેચ છેલ્લા ચાર વર્ષમાં પોતાનો ત્રીજો ઓસ્ટ્રેલિયન ઓપન ખિતાબ જીતવાનો પ્રયાસ કરી રહેલી સબાલેન્કા માટે પોટાપોવા સામેની જીત સરળ ન હતી. પહેલા સેટમાં સબાલેન્કા 6-5 અને 40-0 થી આગળ હતી, પરંતુ પોટાપોવાએ ત્રણ સેટ પોઈન્ટ બચાવીને રમતને ટાઈબ્રેકરમાં ખેંચી લીધી. ટાઈબ્રેકરમાં પણ સ્કોર 3-3 થી બરાબર થયા પછી સબાલેન્કાએ અનુભવનો ફાયદો ઉઠાવ્યો અને બેકહેન્ડ વિનર સાથે પહેલો સેટ જીત્યો.

બીજા સેટમાં મેચ વધુ રોમાંચક રહી. પોટાપોવા એક સમયે 4-0થી પાછળ ચાલી રહી હતી, પરંતુ તેણે જોરદાર વાપસી કરીને સ્કોર 4-4 કરી દીધો. બીજા ટાઈબ્રેકરમાં પોટાપોવા પાસે સેટ જીતવાની ત્રણ તકો હતી, પરંતુ દબાણના પળોમાં સબાલેન્કાએ પોતાનો સંયમ જાળવી રાખ્યો અને મેચ પોતાના નામે કરી.

સબાલેન્કા બોલી- આજે બસ લડવાનો દિવસ હતો મેચ પછી ઓન-કોર્ટ ઇન્ટરવ્યૂમાં સબાલેન્કાએ પોતાની વિરોધી ખેલાડીની ખૂબ પ્રશંસા કરી. તેણે કહ્યું, ‘પોટાપોવાએ અવિશ્વસનીય ટેનિસ રમી. હું લગભગ આખી મેચમાં બેકફૂટ પર હતી. રમતમાં કેટલાક દિવસો એવા હોય છે જ્યારે તમારે ફક્ત લડવું પડે છે અને જીતવા માટે સંઘર્ષ કરવો પડે છે, આજનો દિવસ તેવો જ હતો.’

આર્યના સબાલેન્કા અનાસ્તાસિયા પોટાપોવા સામેની મેચ દરમિયાન.

19 વર્ષની વિટોરિયા મ્બોકો પ્રથમ વખત પ્રી-ક્વાર્ટર ફાઇનલમાં પહોંચી કેનેડાની 19 વર્ષની વિટોરિયા મ્બોકો માટે 23 જાન્યુઆરીનો દિવસ ઐતિહાસિક રહ્યો. તેણે ક્લારા ટૉસનને ત્રણ સેટના મુકાબલામાં 7-6(5), 5-7, 6-3થી હરાવીને પ્રથમ વખત કોઈ ગ્રાન્ડ સ્લેમના ચોથા રાઉન્ડમાં સ્થાન મેળવ્યું છે. જ્હોન કેન એરેનામાં રમાયેલી આ મેચ ઉતાર-ચઢાવથી ભરેલી રહી, જ્યાં બંને ખેલાડીઓએ બેઝલાઇનથી લાંબી રેલીઓ કરી.

નિર્ણાયક સેટમાં મ્બોકોએ દમ બતાવ્યો બીજા સેટમાં ઘણી તકો ગુમાવ્યા પછી, મ્બોકોએ ત્રીજા અને નિર્ણાયક સેટમાં પોતાની લય પાછી મેળવી લીધી. તેણે સતત ત્રણ ગેમ જીતીને 4-1ની લીડ બનાવી લીધી. ટોસને વાપસી કરવાનો પ્રયાસ કર્યો અને બે ગેમ જીતી, પરંતુ મ્બોકોએ પોતાની શક્તિ અને સચોટ શોટ્સના દમ પર જીત સુનિશ્ચિત કરી. મ્બોકોએ પોતાની આ જીત પર કહ્યું, ‘આ બધું પોતાના પર વિશ્વાસનું પરિણામ છે. હું પહેલીવાર અહીં રમી રહી છું અને ચોથા રાઉન્ડમાં પહોંચીને ખૂબ ખુશ છું.’

ડેનિયલ મેદવેદેવ 2024 પછી કોઈ ગ્રાન્ડ સ્લેમના ચોથા રાઉન્ડમાં પહોંચ્યો દુનિયાના 12મા નંબરના ખેલાડી ડેનિયલ મેદવેદેવે ઓસ્ટ્રેલિયન ઓપનના પ્રી-ક્વાર્ટર ફાઇનલમાં સ્થાન બનાવી લીધું છે. 29 વર્ષીય મેદવેદેવે માર્ગારેટ કોર્ટ એરેનામાં રમાયેલી મેચમાં હંગેરીના ફાબિયન મારોઝસનને પાંચ સેટના કડક મુકાબલામાં 6-7, 4-6, 7-5, 6-0, 6-3થી હરાવ્યા. 2024 પછી આ પહેલીવાર છે જ્યારે મેદવેદેવ કોઈ ગ્રાન્ડ સ્લેમના ચોથા રાઉન્ડમાં પહોંચ્યા છે.

2024 પછી આ પહેલીવાર છે જ્યારે મેદવેદેવ કોઈ ગ્રાન્ડ સ્લેમના ચોથા રાઉન્ડમાં પહોંચ્યો છે.

શરૂઆતના બે સેટ હાર્યા પછી મેદવેદેવની વાપસી 26 વર્ષના હંગેરિયન ખેલાડી મારોઝસને શરૂઆતના બે સેટમાં લગભગ પરફેક્ટ ટેનિસ રમ્યો. તેણે તેના ભારે ફોરહેન્ડ અને ડ્રોપ શોટ્સથી મેદવેદેવને ખૂબ પરેશાન કર્યો. એક સમયે એવું લાગી રહ્યું હતું કે મેદવેદેવ ટુર્નામેન્ટમાંથી બહાર થઈ જશે, પરંતુ ત્રણ કલાકથી વધુ ચાલેલી આ મેચમાં રશિયન ખેલાડીએ પોતાની ધીરજ ગુમાવી નહીં. ત્રીજો સેટ નજીવા અંતરથી જીત્યા પછી મેચની સંપૂર્ણ લય મેદવેદેવની તરફેણમાં વળી ગઈ.

થાક મારોઝસન પર ભારે પડ્યો, ચોથો સેટ 19 મિનિટમાં જીત્યો ચોથા સેટની શરૂઆતમાં જ ફાબિયન મારોઝસન થાકના સંકેતો આપવા લાગ્યો હતો. પહેલા બે કલાક સુધી ચાલેલી લાંબી બેઝલાઇન રેલીઓની અસર હંગેરીના ખેલાડી પર દેખાવા લાગી અને તેની સર્વિસની ગતિ પણ ઓછી થઈ ગઈ. મેદવેદેવે તેનો પૂરો ફાયદો ઉઠાવ્યો અને માત્ર 19 મિનિટમાં ચોથો સેટ 6-0થી પોતાના નામે કરી લીધો. પાંચમા અને નિર્ણાયક સેટમાં મેદવેદેવ સંપૂર્ણપણે પ્રભાવી રહ્યા અને 2026 સીઝનની પોતાની સતત 8મી જીત નોંધાવી.

ક્રૅમ્પથી બચવા માટે પીધો ‘અથાણાનો જ્યુસ’ મેચ પછી ઓન-કોર્ટ ઇન્ટરવ્યૂમાં મેદવેદેવે પોતાની રિકવરી વિશે એક રસપ્રદ વાત શેર કરી. તેમણે કહ્યું,’મેં ક્રૅમ્પ (સ્નાયુઓમાં ખેંચાણ) થી બચવા માટે થોડો અથાણાનો રસ (Pickle Juice) પીધો. આ ખૂબ જ મુશ્કેલ મેચ હતી. ગયા વર્ષે હું લગભગ બધી પાંચ સેટવાળી મેચ હારી ગયો હતો, પરંતુ આ વખતે મેં તેને પલટી દીધું. હું પહેલા બે સેટમાં પણ ખરાબ રમી રહ્યો ન હતો, તેથી મેં પોતાને શાંત રાખ્યો. ‘

લર્નર ટિએન સામે થશે મુકાબલો, ગયા વર્ષે મળેલી હારનો બદલો લેવાની તક હવે ચોથા રાઉન્ડમાં મેદવેદેવનો સામનો 20 વર્ષીય અમેરિકન ખેલાડી અને 25મી સીડ લર્નર ટિએન સામે થશે. 2025માં ટિએને જ મેદવેદેવને બીજા રાઉન્ડમાં હરાવીને મોટો અપસેટ સર્જ્યો હતો. ટિએને શુક્રવારે નુનો બોર્ગેસને સીધા સેટમાં હરાવીને અંતિમ 16માં સ્થાન બનાવ્યું છે. મેદવેદેવ પાસે હારનો બદલો લેવા અને ટોપ-10 રેન્કિંગમાં ફરીથી વાપસી કરવાની સુવર્ણ તક છે.

કાર્લોસ અલ્કારેઝે 100 ગ્રાન્ડ સ્લેમ મેચો પછી 87 જીતનો વર્લ્ડ રેકોર્ડ બરાબર કર્યો વિશ્વના નંબર-1 ટેનિસ ખેલાડી કાર્લોસ અલ્કારેઝે મેલબોર્નના રોડ લેવર એરેનામાં પોતાનું પ્રભુત્વ જાળવી રાખીને ઓસ્ટ્રેલિયન ઓપન 2026ના ચોથા રાઉન્ડમાં પ્રવેશ કર્યો છે. શુક્રવારે રમાયેલી મેચમાં સ્પેનિશ સ્ટાર અલ્કારાઝે ફ્રાન્સના કોરેન્ટિન મૂતતને સીધા સેટમાં 6-2, 6-4, 6-1થી કારમી હાર આપી. આ જીત સાથે અલ્કારાઝે ટેનિસ દિગ્ગજ બ્યોર્ન બોર્ગના એક રેકોર્ડની પણ બરાબરી કરી લીધી છે.

22 વર્ષીય કાર્લોસ અલ્કારેઝની આ 100મી ગ્રાન્ડ સ્લેમ મેચ હતી અને આ તેની 87મી જીત છે. આ સાથે તેણે સ્વીડનના દિગ્ગજ ખેલાડી બ્યોર્ન બોર્ગના રેકોર્ડની બરાબરી કરી લીધી છે, જેમણે પોતાની શરૂઆતની 100 ગ્રાન્ડ સ્લેમ મેચ પછી 87 જીત નોંધાવી હતી. અલ્કારેઝ હવે ઓપન એરામાં શરૂઆતની 100 મેચમાં સૌથી વધુ જીત નોંધાવનારા ખેલાડીઓની યાદીમાં ટોચ પર આવી ગયો છે.