દુનિયાભરની હજારો શાળાઓ અને યુનિવર્સિટીઓમાં ઉપયોગમાં લેવાતી કેનવાસ (Canvas) ઓનલાઈન લર્નિંગ સિસ્ટમ ગુરુવારે સાયબર હુમલા બાદ ઠપ્પ થઈ ગઈ. ફાઇનલ પરીક્ષા પહેલાં જ થયેલા આ આઉટેજે લાખો વિદ્યાર્થીઓ અને શિક્ષકોને મુશ્કેલીમાં મૂકી દીધા.

કેનવાસનો ઉપયોગ ઓનલાઈન અભ્યાસ, અસાઇનમેન્ટ, ગ્રેડ, લેક્ચર વીડિયો અને પરીક્ષા સામગ્રી માટે થાય છે. સિસ્ટમ બંધ થયા બાદ વિદ્યાર્થીઓ તેમના નોટ્સ, લેક્ચર સ્લાઇડ્સ અને ફાઇનલ પરીક્ષા સામગ્રી સુધી પહોંચી શક્યા નહીં. સોશિયલ મીડિયા પર મોટી સંખ્યામાં વિદ્યાર્થીઓએ ફરિયાદ કરી કે તેઓ પરીક્ષાની તૈયારી કરી શકતા નથી.

સાયબર સિક્યોરિટી ફર્મ એમિસોફ્ટના થ્રેટ એનાલિસ્ટ લ્યુક કોનોલીના જણાવ્યા અનુસાર, શાઈનીહન્ટર્સ (ShinyHunters) નામના હેકર ગ્રુપે હુમલાની જવાબદારી લીધી છે. ગ્રુપે દાવો કર્યો કે તેણે લગભગ 9 હજાર સ્કૂલ અને શૈક્ષણિક સંસ્થાઓના અબજો ખાનગી મેસેજ અને રેકોર્ડ્સ સુધી પહોંચ મેળવી છે.

રિપોર્ટ્સ અનુસાર, હેકર્સ રવિવારથી ડેટા લીક કરવાની ધમકી આપી રહ્યા હતા. તેમણે ગુરુવાર અને 12 મે સુધીની ડેડલાઇન નક્કી કરી છે. નિષ્ણાતોનું માનવું છે કે આ ખંડણી સંબંધિત મામલો હોઈ શકે છે.

જોકે, Canvas ની પેરેન્ટ કંપની Instructure એ હજુ સુધી સ્પષ્ટ કર્યું નથી કે સિસ્ટમને સુરક્ષા કારણોસર બંધ કરવામાં આવી હતી કે હેકર્સે તકનીકી રીતે તેને ઠપ્પ કરી દીધી હતી.

અમેરિકાની યુનિવર્સિટી ઓફ આયોવાએ તેને ‘રાષ્ટ્રીય સ્તરની સાયબર સુરક્ષા ઘટના’ ગણાવી. વર્જિનિયા ટેકે કહ્યું કે આઉટેજની અસર ફાઇનલ પરીક્ષાઓ અને સેમેસ્ટરની પ્રવૃત્તિઓ પર પડી રહી છે. જ્યારે યુનિવર્સિટી ઓફ ટેક્સાસ એટ સેન એન્ટોનિયોએ કેટલીક ફાઇનલ પરીક્ષાઓ આગળ વધારી દીધી છે.

યુનિવર્સિટી ઓફ પેન્સિલવેનિયાના એક વરિષ્ઠ લેક્ચરરે જણાવ્યું હતું કે વિદ્યાર્થીઓ આખા સેમેસ્ટરના અભ્યાસ માટે Canvas પર નિર્ભર હતા અને હવે શૈક્ષણિક વ્યવસ્થા સંપૂર્ણપણે પ્રભાવિત થઈ ગઈ છે.

નિષ્ણાતોના મતે, શિક્ષણ સંસ્થાઓમાં હાજર મોટી માત્રામાં ડિજિટલ ડેટા તેમને સાયબર અપરાધીઓનું મોટું નિશાન બનાવે છે. આ પહેલા પણ અમેરિકાના ઘણા સ્કૂલ ડિસ્ટ્રિક્ટ મોટા સાયબર હુમલાનો શિકાર બની ચૂક્યા છે.

દિવ્ય ભાસ્કરને Google પર મનપસંદ સોર્સ બનાવો