WhatsApp પર આપણે રોજ મિત્રો અને પરિવાર સાથે ચેટ કરીએ છીએ, ફોટો-વીડિયો મોકલીએ છીએ અને Status પણ શેર કરીએ છીએ. પરંતુ શું તમે ક્યારેય વિચાર્યું છે કે તમારી પ્રોફાઇલ ફોટો, ખાનગી ચેટ અથવા Status કોણ જોઈ શકે છે? WhatsAppમાં એવા ઘણા ફીચર્સ છે, જેની મદદથી તમે તમારી પ્રાઇવસી પર વધુ કંટ્રોલ રાખી શકો છો.
WhatsAppની આ 5 સેટિંગ્સ જરૂર ચેક કરો
Metaની આ મેસેજિંગ એપમાં તમે ખાનગી ચેટને લોક કરી શકો છો, ફોનના Fingerprint અથવા Face IDથી એપને સુરક્ષિત રાખી શકો છો અને તમારી પ્રોફાઇલ ફોટો તથા Status કોને દેખાશે તે પણ નક્કી કરી શકો છો. આ ઉપરાંત, View Once ફીચરથી કેટલાક ફોટો અને વીડિયો એકવાર જોયા પછી ચેટમાંથી ગાયબ થઈ જાય છે. જો તમે ઇચ્છો છો કે તમારી ખાનગી વાતચીત અને માહિતી વધારે લોકો સુધી ન પહોંચે, તો WhatsAppની આ 5 સેટિંગ્સ જરૂર ચેક કરો.
ખાનગી ચેટને કરો લોક
જો WhatsApp પર તમારી કેટલીક એવી ચેટ છે, જેને તમે અન્ય લોકોથી છુપાવીને રાખવા માંગો છો, તો Chat Lock કામ આવી શકે છે. આ ફીચર ચાલુ કર્યા પછી લોક કરેલી ચેટ સામાન્ય ચેટ લિસ્ટમાંથી હટીને અલગ Locked Chats ફોલ્ડરમાં જતી રહે છે. Android અને iPhoneમાં જે ચેટને લોક કરવી હોય તેના પર ટેપ કરીને રાખો અથવા તેને ડાબી તરફ સ્વાઇપ કરો. ત્યારબાદ More optionsમાં જઈને Lock chat અથવા Unlock chatનો વિકલ્પ પસંદ કરો. WhatsApp Web અને Windows પર ચેટ પર Right Click કરીને પણ તેને લોક અથવા અનલોક કરી શકાય છે. ચેટ લોક કર્યા પછી સામેની વ્યક્તિને તેની કોઈ જાણ થતી નથી. ફોન લોક કરતાં જ ચેટ પણ આપમેળે લોક થઈ જાય છે. તમે ઇચ્છો તો Secret Code સેટ કરીને Locked Chats ફોલ્ડરને પણ છુપાવી શકો છો.
પ્રોફાઇલ ફોટો કોને દેખાય તે નક્કી કરો
WhatsApp પર મેસેજ મોકલતી વખતે તમારી પ્રોફાઇલ ફોટો સામેની વ્યક્તિને દેખાઈ શકે છે. જો તમે નથી ઇચ્છતા કે દરેક વ્યક્તિ તમારી ફોટો જોઈ શકે, તો તેની પ્રાઇવસી સેટિંગ બદલી શકો છો. Androidમાં More options > Settings > Privacy > Profile photo પર જાઓ. iPhoneમાં Settings > Privacy > Profile Photo ખોલો. અહીં તમે પસંદ કરી શકો છો કે તમારી ફોટો Everyone, My Contacts, My Contacts except… અથવા Noneમાંથી કોને દેખાય. એટલે કે ફોટો દરેક વ્યક્તિ માટે ખુલ્લી રાખવાને બદલે તમે તેને માત્ર તમારા કોન્ટેક્ટ્સ અથવા પસંદ કરેલા લોકો સુધી મર્યાદિત કરી શકો છો.
Face ID અથવા Fingerprintથી WhatsApp સુરક્ષિત રાખો
માત્ર ચેટને લોક કરવાની સાથે તમે આખી WhatsApp એપને પણ લોક કરી શકો છો. App Lock ફીચર ચાલુ કર્યા પછી એપ ખોલવા માટે ફોન પ્રમાણે Fingerprint, Face ID, Touch ID અથવા પાસવર્ડની જરૂર પડી શકે છે. આનાથી જો કોઈના હાથમાં તમારો ફોન આવી જાય તો પણ તે સરળતાથી WhatsApp ખોલી શકશે નહીં. જોકે, એપ લોક હોવા છતાં નોટિફિકેશનમાંથી મેસેજ અથવા કોલનો જવાબ આપી શકાય છે.
View Onceથી ફોટો-વીડિયો મોકલો
જો તમે કોઈ ખાનગી ફોટો, વીડિયો અથવા વૉઇસ મેસેજ મોકલવા માંગો છો, જેને સામેની વ્યક્તિ વારંવાર જોઈ ન શકે, તો View Once ફીચરનો ઉપયોગ કરી શકો છો. આ ફીચરથી મોકલવામાં આવેલો ફોટો અથવા વીડિયો એકવાર જોયા પછી ચેટમાંથી ગાયબ થઈ જાય છે. WhatsApp અનુસાર, આવા મીડિયા મેળવનાર વ્યક્તિ તેને પોતાના Photos અથવા Galleryમાં સેવ કરી શકશે નહીં અને તેનો Screenshot અથવા Screen Recording પણ કરી શકશે નહીં.
Status માત્ર પસંદગીના લોકોને બતાવો
WhatsApp Status સામાન્ય રીતે તમારા કોન્ટેક્ટ્સ સાથે શેર થાય છે. પરંતુ દરેક અપડેટ દરેક વ્યક્તિને દેખાય તે જરૂરી નથી. તમે Statusની ઓડિયન્સ નક્કી કરી શકો છો અને પસંદ કરી શકો છો કે તમારો Status કોણ જોઈ શકે. તમે જે લોકોને અથવા ગ્રુપ્સને Statusમાં Mention કરો છો, તેઓ તેને પોતાની ઓડિયન્સ સાથે શેર કરી શકે છે. તમે એવા લોકોને પણ Mention કરી શકો છો, જેમનો નંબર તમારી Contact Listમાં સેવ નથી. તેથી Status પોસ્ટ કરતા પહેલા તે કોની સાથે શેર થઈ રહ્યો છે, તે ચોક્કસપણે ચેક કરી લો.
આ પણ વાંચો: Metaએ ભારતમાં લોન્ચ કર્યું Meta One, જાણો કયા પ્લાનમાં શું મળશે
