સિનેમાહોલનો યુગ ‘સમાપ્ત’ થવાની અફવાઓ વચ્ચે 2026ને કોવિડ પછી વૈશ્વિક બોક્સ ઓફિસ માટે શ્રેષ્ઠ વર્ષ માનવામાં આવી રહ્યું છે. દુનિયાભરના થિએટર્સમાં રોનક ફરી પાછી ફરી છે, જેનું મોટું કારણ Gen Z છે.

ફેનડેંગોના સર્વેમાં 87% જનરલ ઝેડ (1997–2012)એ છેલ્લા 12 મહિનામાં ઓછામાં ઓછી એક ફિલ્મ સિનેમાઘરમાં ચોક્કસ જોઈ. ત્યારબાદ મિલેનિયલ્સ (1981થી 1996) 82% રહ્યા. આ મામલે જનરેશન ‘X’ (1965 થી 1980) 70% અને 1946 થી 1964 વચ્ચે જન્મેલા બૂમર્સ 58% રહ્યા. સર્વે અનુસાર, Gen Z વર્ષમાં સરેરાશ 7 વખત સિનેમાઘર જાય છે. આ બાકીના સમૂહો કરતાં વધુ છે.

Gen Z સ્ટ્રીમિંગ અને સોશિયલ મીડિયા સાથે મોટી થઈ, પરંતુ હવે ઘણા યુવાનો અલ્ગોરિધમવાળા ડિજિટલ માહોલથી થાકી રહ્યા છે. ‘ટોક ઓફ ધ ટાઉનસેન્ડ્સ’ પોડકાસ્ટના હોસ્ટ બેનેડિક્ટ અને હન્ના ટાઉનસેન્ડ અનુસાર, ઇન્ટરનેટ હવે પરેશાન કરનારું લાગવા માંડ્યું છે, તેથી Gen Z સ્ક્રીનથી બહાર સામાજિક અનુભવ ઇચ્છે છે, જેમાં સિનેમા મહત્વપૂર્ણ ભૂમિકા ભજવી રહ્યું છે.

22 વર્ષીય ટિકટોકર ફ્લોરેન્સ રોઝ કહે છે કે થિયેટર જવું મિત્રો સાથે જોડાવાનો એક માર્ગ બની ગયો છે, જ્યાં થોડા સમય માટે ફોનથી દૂર રહી શકાય છે.

ભારતમાં ટિકિટ ખરીદનારાઓમાં 60%થી વધુ યુવાનો

ભારતમાં સિનેમા આજે પણ ‘ગ્રુપ ઇવેન્ટ’ જેવું છે. ભારતીય મલ્ટિપ્લેક્સ ચેઇન (PVR-INOX) ના આંકડા અનુસાર, સિનેમા ટિકિટ ખરીદનારા 60% થી વધુ લોકો 15 થી 30 વર્ષની વયના છે. બીજી તરફ, બુકમાય શોના રિપોર્ટ અનુસાર, ભારતમાં લગભગ 75% મૂવી ટિકિટ ઓનલાઈન બુક થાય છે અને તેમાં મોટાભાગની બુકિંગ 18-25 વર્ષના યુવાનો કરે છે.

કોન્સર્ટની સરખામણીમાં સિનેમા હજુ પણ સસ્તું

મોંઘા કોન્સર્ટ અને ક્લબિંગની સરખામણીમાં સિનેમા હજુ પણ સસ્તું છે. યુકે નાઇટ ટાઇમ ઇન્ડસ્ટ્રીઝ એસોસિએશન અનુસાર, 68% યુવાનો વધુ ખર્ચને કારણે સિનેમાને પ્રાધાન્ય આપી રહ્યા છે. લેટરબોક્સ્ડ જેવી એપ્સે સિનેમાનો ક્રેઝ વધાર્યો છે, જ્યાં યુઝર્સ ફિલ્મ રિવ્યુ શેર કરે છે. તેના યુઝર્સ 2020માં 17 લાખ હતા જે 2026માં વધીને 2.6 કરોડ થઈ ગયા. જ્યારે બાર્બી એપ પર જ 11 લાખથી વધુ રિવ્યૂ આવી ચૂક્યા છે, જે ફિલ્મો પ્રત્યેનો ઉત્સાહ દર્શાવે છે.

દિવ્ય ભાસ્કરને Google પર મનપસંદ સોર્સ બનાવો