પીચ રિપોર્ટ અને રેકોર્ડ

ઈડન ગાર્ડન્સની પીચ સામાન્ય રીતે બેટર્સ માટે મદદરૂપ માનવામાં આવે છે, તેથી અહીં હાઈ-સ્કોરિંગ મુકાબલાની અપેક્ષા રાખવામાં આવી રહી છે. પીચ ક્યુરેટર સુજાન મુખર્જીએ કહ્યું કે સૌરવ ગાંગુલી પીચની તૈયારી જોઈને સંતુષ્ટ લાગ્યા.

મુખર્જીએ જણાવ્યું કે આ પરંપરાગત ઈડન ગાર્ડન્સની વિકેટ છે, જ્યાં સામાન્ય રીતે સારા રન બને છે, પરંતુ સ્પિનરોને પણ થોડી મદદ મળી જાય છે. સાંજના મેચમાં ઝાકળ આવવાની સંભાવના છે.

ભારત અને વેસ્ટ ઈન્ડિઝ વચ્ચે સુપર-8નો મુકાબલો એ જ પીચ પર થશે, જ્યાં સ્કોટલેન્ડ-ઈટાલી મેચ થઈ હતી. સ્કોટલેન્ડે પહેલા બેટિંગ કરતા 207 રન બનાવ્યા હતા, જવાબમાં ઈટાલી 134 રન પર ઓલઆઉટ થઈ ગયું હતું.

કોલકાતામાં 17 T20 ઇન્ટરનેશનલ રમાઈ છે. પહેલા બેટિંગ કરનારી ટીમે 9 અને ટાર્ગેટને ચેઝ કરનારી ટીમે 8 મેચ જીતી છે. અહીંનો હાઈએસ્ટ ટીમ સ્કોર 207/4 છે, જે સ્કોટલેન્ડે ઇટાલી સામે બનાવ્યો હતો.

આ વર્લ્ડ કપમાં અહીં અત્યાર સુધી 5 મેચ રમાઈ છે. 4 મેચ પહેલા બેટિંગ કરનારી ટીમે જીતી. 1 મેચ ચેઝ કરનારી ટીમે જીતી. 2 મેચ દિવસમાં અને 3 રાત્રે રમાઈ. રાત્રિની મેચોમાં પણ 3 માંથી 2 મુકાબલા પહેલા બેટિંગ કરનારી ટીમોએ જીત્યા.