ICCએ ક્રિકેટ કેનેડાની સદસ્યતાને સસ્પેન્ડ કરી દીધી છે. આ નિર્ણય કેનેડા બોર્ડ દ્વારા સદસ્યતાના નિયમો અને જવાબદારીઓના ઉલ્લંઘનને કારણે લેવામાં આવ્યો છે. જોકે, ICCએ સ્પષ્ટ કર્યું છે કે બોર્ડની ખામીઓનો ભોગ ત્યાંના ખેલાડીઓને બનવું પડશે નહીં. કાઉન્સિલે આ નિર્ણય 1 જૂને અમદાવાદમાં યોજાયેલી વાર્ષિક બેઠકમાં લીધો. ICC ટુર્નામેન્ટમાં રમી શકશે ખેલાડીઓ ICCએ પુષ્ટિ કરી છે કે સસ્પેન્શનના સમયગાળા દરમિયાન પણ કેનેડાની નેશનલ ટીમો ICC ટુર્નામેન્ટમાં રમવા માટે યોગ્ય રહેશે. કાઉન્સિલનું માનવું છે કે જે મુદ્દાઓ પર ખેલાડીઓનું કોઈ નિયંત્રણ નથી, તેના માટે તેમને સજા મળવી જોઈએ નહીં. ICC મેનેજમેન્ટની દેખરેખ હેઠળ મળશે ફંડિંગ ખેલાડીઓની રમતમાં કોઈ અવરોધ ન આવે, તે માટે ક્રિકેટ કેનેડાને ICC તરફથી ફંડિંગ મળતું રહેશે. જોકે, આ વખતે ફંડિંગની રીત સંપૂર્ણપણે ICC મેનેજમેન્ટના નિયંત્રણમાં હશે. આ ફંડનો ઉપયોગ ફક્ત મંજૂર કરાયેલા નેશનલ ટીમ પ્રોગ્રામ્સ માટે જ થઈ શકશે, જેથી આંતરરાષ્ટ્રીય ક્રિકેટમાં ટીમની તૈયારી અને ભાગીદારી કોઈપણ અવરોધ વિના ચાલુ રહે. વિવાદોમાં ઘેરાયેલું છે કેનેડા ક્રિકેટ બોર્ડ ક્રિકેટ કેનેડા છેલ્લા કેટલાક સમયથી ગવર્નન્સ અને ઇમાનદારી સંબંધિત અનેક વિવાદોનો સામનો કરી રહ્યું છે. છેલ્લા બે વર્ષમાં બોર્ડ રમત કરતાં વધુ વિવાદોને કારણે ચર્ચામાં રહ્યું છે. આમાંથી એક મોટો મામલો ટી-20 વર્લ્ડ કપ 2026માં કેનેડા અને ન્યુઝીલેન્ડ વચ્ચે રમાયેલી મેચ સાથે સંકળાયેલો છે, જેની તપાસ હજુ પણ ICCની એન્ટી-કરપ્શન યુનિટ (ACU) કરી રહી છે. પૂર્વ હેડ કોચના ઓડિયો લીકથી વિવાદ વધ્યો
બોર્ડ સામે વધુ એક મોટી મુશ્કેલી પૂર્વ હેડ કોચ ખુર્રમ ચૌહાણ સાથે જોડાયેલી છે. ગયા વર્ષે એક ફોન વાતચીતની ઓડિયો રેકોર્ડિંગ સામે આવી હતી, જેણે ક્રિકેટ જગતમાં ચિંતાઓ વધારી દીધી હતી. આ રેકોર્ડિંગમાં ચૌહાણે આરોપ લગાવ્યો હતો કે ક્રિકેટ કેનેડાના સિનિયર અધિકારીઓએ નેશનલ સ્ક્વોડમાં કેટલાક મનપસંદ ખેલાડીઓને સામેલ કરવાનો પ્રયાસ કર્યો હતો. આ સાથે જ વાતચીતમાં મેચોને મેનિપ્યુલેટ (ફિક્સ) કરવાના પ્રયાસના આરોપો પણ હતા, જેના પછી ICCના ઇન્ટિગ્રિટી અધિકારીઓએ તેની તપાસ શરૂ કરી દીધી. સસ્પેન્શન કાયમી નથી આ સસ્પેન્શન કાયમી એટલે કે હંમેશા માટે નથી. ICC ક્રિકેટ કેનેડાને કેટલીક શરતો સોંપશે, જેને સભ્યપદ પાછું મેળવવા માટે પૂરી કરવી પડશે. બોર્ડમાં સુધારાઓ અને ફેરફારો માટે ICCની નોર્મલાઇઝેશન કમિટી અને ICC મેનેજમેન્ટ સાથે મળીને નજર રાખશે. આ શરતો અને આવશ્યક ગવર્નન્સ રિફોર્મ્સથી સંપૂર્ણપણે સંતુષ્ટ થયા પછી જ ICC સભ્યપદ પુનઃસ્થાપિત કરશે.