ઇન્ડિગો એરલાઇનની પેરન્ટ કંપની ઇન્ટરગ્લોબ એવિએશને 29 મે 2026 ના રોજ સમાપ્ત થયેલા ચોથા ક્વાર્ટર (Q4FY26) ના પરિણામો જાહેર કર્યા છે. આ ક્વાર્ટરમાં કંપનીને ₹2,536 કરોડનું કોન્સોલિડેટેડ નેટ લોસ (ચોખ્ખું નુકસાન) થયું છે. ગયા વર્ષના આ જ ક્વાર્ટરમાં કંપનીને ₹3,068 કરોડનો કોન્સોલિડેટેડ નેટ પ્રોફિટ (ચોખ્ખો નફો) થયો હતો.

દેશની સૌથી મોટી એરલાઇન હાલમાં અનેક પડકારોનો સામનો કરી રહી છે. કંપનીને આ નુકસાન મુખ્યત્વે ડોમેસ્ટિક ક્ષમતા પરના પ્રતિબંધો, ભારતીય રૂપિયામાં આવેલી નબળાઈ અને હવાઈ ઇંધણ એટલે કે ફ્યુઅલની વધતી કિંમતોને કારણે થયું છે. આ ઉપરાંત, આ ક્વાર્ટરમાં કંપની પર ₹250 કરોડનો વન-ટાઇમ ચાર્જ પણ લાગ્યો છે.

વાર્ષિક ધોરણે નુકસાન છતાં, કંપનીની ઓપરેશનલ રેવન્યુમાં થોડો વધારો જોવા મળ્યો છે. નાણાકીય વર્ષ 2026 ના ચોથા ક્વાર્ટરમાં ઇન્ડિગોની રેવન્યુ નજીવો વધીને ₹22,438 કરોડ પર પહોંચી ગઈ. ગયા નાણાકીય વર્ષ (Q4FY25) ના સમાન ક્વાર્ટરમાં કંપનીની રેવન્યુ ₹22,152 કરોડ હતી.

450 મિલિયન ડોલરના પ્રીપેમેન્ટને મંજૂરી મળી

ઇન્ડિગોના બોર્ડે કંપનીના ફાઇનાન્સ લીઝ ઓબ્લિગેશન્સ (લીઝ જવાબદારીઓ)ના આંશિક પ્રીપેમેન્ટને મંજૂરી આપી દીધી છે. આ ચુકવણી એક કે તેથી વધુ હપ્તામાં કંપનીની સંપૂર્ણ માલિકીની પેટાકંપની ‘ઇન્ટરગ્લોબ એવિએશન ફાઇનાન્સિયલ સર્વિસિસ IFSC પ્રાઇવેટ લિમિટેડ’ને કરવામાં આવશે.

તેની કુલ રકમ લગભગ 450 મિલિયન ડોલર સુધીની હશે. આ ફંડનો ઉપયોગ પેટાકંપની વિમાન, વિમાનના એન્જિન અને પાર્ટ્સ ખરીદવા માટે કરશે, જેનાથી એરલાઇનને પોતાના એવિએશન એસેટ્સની માલિકી મળશે.

કુલ આવક 6% થી વધુ વધી છે: કંપનીના મેનેજિંગ ડિરેક્ટર

કંપનીના મેનેજિંગ ડિરેક્ટર (MD) રાહુલ ભાટિયાએ જણાવ્યું કે નાણાકીય વર્ષ 2026 બિઝનેસની દ્રષ્ટિએ ખૂબ જ પડકારજનક રહ્યું, જેણે અમારા નફાને ઘણો પ્રભાવિત કર્યો છે. આ પ્રતિકૂળ પરિસ્થિતિઓ છતાં બિઝનેસનું મૂળભૂત પ્રદર્શન મજબૂત રહ્યું. આ વર્ષે અમારી ક્ષમતામાં 9.5% નો વધારો થયો અને કુલ આવક 6% થી વધુ વધી છે.

જો આપણે વિદેશી મુદ્રા (ફોરેન એક્સચેન્જ) ના ઉતાર-ચઢાવ અને એકસાથેની વસ્તુઓની અસરને દૂર કરીએ, તો ઇન્ડિગોએ ₹7,500 કરોડનો નફો કર્યો છે. અમે સતત ઉતાર-ચઢાવ વચ્ચે એક મજબૂત બેલેન્સ શીટ અને પર્યાપ્ત રોકડ (લિક્વિડિટી) જાળવી રાખવામાં સફળ રહ્યા છીએ.

મિડલ ઇસ્ટ સંકટ અને લેબર લોની અસર

પેસેન્જર્સ અને લોડ ફેક્ટરમાં ઘટાડો

કંપની દ્વારા સ્ટોક એક્સચેન્જને આપવામાં આવેલી માહિતી અનુસાર, આ ક્વાર્ટરમાં ઇન્ડિગોના મુસાફરોની સંખ્યામાં 1.1% નો નજીવો ઘટાડો થયો છે, જે ઘટીને 31.6 મિલિયન થઈ ગઈ છે.

પ્રતિ કિલોમીટર કમાણી (યીલ્ડ) પણ 2.2% ઘટીને ₹5.20 થઈ ગઈ છે. આ સાથે પેસેન્જર લોડ ફેક્ટરમાં 1.7% નો ઘટાડો થયો છે અને તે ઘટીને 85.8% પર આવી ગયો છે.

6 મહિનામાં ઇન્ડિગોનો શેર 17.13% ઘટ્યો

ક્વાર્ટરના પરિણામો પહેલાં ઇન્ટરગ્લોબ એવિએશનનો શેર આજે 3.28% ઘટીને 4,420 રૂપિયાના સ્તરે બંધ થયો. કંપનીનો શેર 5 દિવસમાં 2.3% ઘટ્યો અને એક મહિનામાં 1.72% વધ્યો છે. જ્યારે શેર છેલ્લા 6 મહિનામાં 24% અને એક વર્ષમાં 17% ઘટ્યો છે. કંપનીનું માર્કેટ કેપ 1.71 લાખ કરોડ રૂપિયા છે.

ભારતની સૌથી મોટી એરલાઇન છે ઇન્ડિગો

માર્કેટ શેરની દ્રષ્ટિએ ઇન્ડિગો દેશની સૌથી મોટી એરલાઇન છે. ભારતીય એરલાઇન માર્કેટમાં કંપનીનો માર્કેટ શેર લગભગ 60% છે. તેની સ્થાપના 2006માં રાહુલ ભાટિયા અને રાકેશ ગંગવાલે કરી હતી. એરલાઇન પાસે 400થી વધુ એરક્રાફ્ટનો કાફલો છે. તેના 50 કરોડથી વધુ ગ્રાહકો છે.

શું હોય છે ASKs અને લોડ ફેક્ટર?

અવેલેબલ સીટ કિલોમીટર (ASKs): તેનો અર્થ એ થાય છે કે એરલાઇન પાસે કુલ કેટલી સીટો ઉપલબ્ધ હતી અને તેમણે કેટલા કિલોમીટરનું અંતર કાપ્યું. આ એરલાઇનની કુલ પેસેન્જર ક્ષમતાને માપવાનો માપદંડ છે.

લોડ ફેક્ટર: તેનાથી ખબર પડે છે કે ઉડાન દરમિયાન એરલાઇનની કેટલી ટકા સીટો ભરેલી હતી. જેટલો વધુ લોડ ફેક્ટર હશે, એરલાઇનની ક્ષમતાનો તેટલો જ સારો ઉપયોગ માનવામાં આવે છે.

દિવ્ય ભાસ્કરને Google પર મનપસંદ સોર્સ બનાવો