નીરજ ગ્રોવર હત્યાકાંડના પાર્ટ-1માં તમે વાંચ્યું કે, કેવી રીતે કાસ્ટિંગ ડિરેક્ટર પોતાની મિત્ર અને એક્ટ્રેસ મારિયા સુસઈરાજના ઘરે ગયો અને ગુમ થઈ ગયો. એક્ટ્રેસ મારિયાએ નીરજના પરિવાર સાથે તેની ગુમ થયાની ફરિયાદ નોંધાવી. પોલીસ તપાસમાં નીરજના મોબાઈલ પર આવેલા એક કોલની મદદથી મારિયા પર શંકા થઈ, ત્યારબાદ તે સતત ગેરમાર્ગે દોરનારા નિવેદનો આપવા લાગી.

મારિયાની બિલ્ડિંગના ગાર્ડે પૂછપરછમાં જણાવ્યું કે, ‘મારિયા 7 મે 2008ની સાંજે કેટલાક ભારે બેગ્સ લઈ જતી દેખાઈ હતી, તે સમયે તેના બોયફ્રેન્ડ જેરોમ મેથ્યુ પણ સાથે હતો.’ જ્યારે પૂછપરછમાં જેરોમે કહ્યું હતું કે, ‘તે મારિયાની બિલ્ડિંગમાં ગયો જ નહોતો.’

નીરજના ગુમ થયાના લગભગ 2 અઠવાડિયા પછી કડકાઈ કરવા પર મારિયાએ કહ્યું કે, ‘નીરજની હત્યા થઈ ચૂકી છે. જેરોમે નીરજની હત્યા કરી, પછી તેણે લાશની સામે મારો રેપ કર્યો. આ પછી બંનેએ મળીને લાશના 300 ટુકડા કર્યાં અને તેને ઠેકાણે લગાવ્યો.’

નીરજ ગ્રોવર હત્યાકાંડના પાર્ટ- 2માં વાર્તા આગળ-

મારિયાના ચોંકાવનારા નિવેદન પછી 22 મે 2008ના રોજ મુંબઈ પોલીસની ટીમે જેરોમ મેથ્યુને કોચીથી કસ્ટડીમાં લીધો.

જેરોમ મેથ્યુની ધરપકડ કોચીથી થઈ હતી.

થોડીવાર સુધી અલગ-અલગ વાર્તાઓ સંભળાવ્યા પછી તેણે કહ્યું કે, ‘નીરજની હત્યાની માસ્ટરમાઇન્ડ મારિયા છે.’ બંને એકબીજા પર આરોપ લગાવી રહ્યા હતા.

‘નીરજની હત્યા કરી જેરોમે મને ધમકાવી હતી’

બંનેને કોર્ટમાં રજૂ કરીને અટકાયતમાં લેવામાં આવ્યા. મારિયા આ નિવેદન પર અડગ હતી કે, જેરોમે નીરજની હત્યા કરી અને તેના પર દુષ્કર્મ આચર્યું. નીરજની હત્યા કર્યા પછી જેરોમે તેને ધમકી આપી કે, જો કોઈને કંઈ કહ્યું, તો તે તેને પણ મારી નાખશે. આવી સ્થિતિમાં મારિયાને મજબૂરીમાં તેનો સાથ આપવો પડ્યો અને લાશના ટુકડા કરવા પડ્યા. 22 મેના રોજ મારિયા પોલીસને મુંબઈથી લગભગ 90 કિલોમીટર દૂર મનોરના જંગલમાં લઈ ગઈ, જ્યાં નિર્જન ઝાડીઓમાં તેણે નીરજની લાશ ઠેકાણે પાડી હતી.

મનોરની તે જગ્યા, જ્યાં નીરજની લાશના ટુકડા બાળવામાં આવ્યા હતા.

એક સ્થળ પર પહોંચીને મારિયાએ જમીન તરફ ઈશારો કર્યો. જગ્યા જોઈને લાગતું હતું કે, જાણે કોઈએ કચરો બાળ્યો હોય. પોલીસ નજીક પહોંચી તો ત્યાં લાશના કેટલાક અડધા બળેલા ટુકડા, કેટલાક હાડકાં, બળેલા ફૂલો, કેટલીક બોટલો અને બળેલા કપડાં હતા. તપાસ કરવામાં આવી, તો તે જગ્યાએ એક મોતીની માળા હતી, જેમાં ભગવાન ગણેશનું પેન્ડન્ટ હતું.

નીરજના પિતા અમરનાથ ગ્રોવર અને કેટલાક મિત્રોએ પુષ્ટિ કરી કે તે પેન્ડન્ટ નીરજનું જ હતું.

મારિયાનું કન્ફેશન, જેમાં તે રાતની કહાણી વર્ણવવામાં આવી હતી…

“મારું નામ મિસ મારિયા જોસેફ સુસઈરાજ છે. ઘટનાના દિવસે હું મલાડ (વેસ્ટ)માં રહેતી હતી. 6 મે 2008ના રોજ મેં મલાડ (પશ્ચિમ)માં એક ફ્લેટ ભાડે લીધો હતો. હું માર્ચ 2008થી નીરજ ગ્રોવરને ઓળખતી હતી. તે મારા મિત્ર હતા. માર્ચ 2008થી હું તેમની સાથે ફોન પર સંપર્કમાં હતી. 29 એપ્રિલ 2008થી ઘટનાની તારીખ સુધી હું તેમને રોજ મળતી રહી હતી.”

“6 મે 2008ના રોજ હું આખો દિવસ સામાનની ખરીદી કરી રહી હતી. તે દિવસે રાત્રે લગભગ 10:30 વાગ્યે નીરજે મને ફોન કર્યો. મેં તેમને કહ્યું હતું કે, હું મળી શકું તેમ નથી કારણ કે હું થાકેલી હતી. રાત્રે લગભગ 11:00 વાગ્યે, હું મારા પડોશીના ઘરેથી નહાઈને બહાર આવી, ત્યારે મેં જોયું કે નીરજ મારા ઘરના દરવાજા પર ઊભા હતા. મેં તેમને મારી પડોશી મિત્ર મિસ મયૂરી સાથે ઓળખાણ કરાવી. પછી અમે મારા ઘરની અંદર ગયા. મેં તેમને પૂછ્યું કે, તેઓ શા માટે આવ્યા છે? તેમણે કહ્યું કે, તેઓ ઘર ગોઠવવામાં મારી મદદ કરવા માંગે છે.”

મારિયા આ જ ધીરજ સોલિટિયર બિલ્ડિંગના ચોથા માળે રહેવા આવી હતી.

‘તે દિવસે નીરજનું વર્તન વિચિત્ર હતું’

“રાત્રે લગભગ 11:30 વાગ્યે મને મિસ્ટર જેરોમ મેથ્યુનો ફોન આવ્યો, જેમની સાથે હું લગ્ન કરવાનો ઇરાદો રાખતી હતી. મેં તેમને જણાવ્યું કે, નીરજ મારા ઘરે છે. જેરોમે કોચીન (નવું નામ – કોચી)થી મને ફોન કર્યો હતો. મારા મોબાઇલની બેટરી ખતમ થઈ ગઈ હતી. આ પછી જેરોમે નીરજના મોબાઇલ ફોન પર મને કોલ કર્યો. મેં જેરોમને જણાવ્યું કે, નીરજ તે દિવસે કંઈક વિચિત્ર વર્તન કરી રહ્યો છે. મેં તેમને કહ્યું કે ડિનર પછી નીરજ જતો રહેશે. આ બધું લગભગ રાત્રે 12:30 વાગ્યે થયું.”

“તે પછી મેં નીરજ સાથે જમ્યું. નીરજ તેના ફોન કોલમાં વ્યસ્ત હતો. હું ઘરની સફાઈ કરી રહી હતી. નીરજને તેના મિત્રોએ પાર્ટીમાં આવવા બોલાવ્યો હતો, પણ તે ગયો નહીં. મેં પણ તેની સાથે જવાની ના પાડી દીધી. નીરજને સવારે મલાડમાં કામ હતું. તેણે મને વિનંતી કરી કે, હું તેને મારા ઘરમાં રોકાવાની પરવાનગી આપું, જેથી તે કામ પર જઈ શકે. તે મારા ઘરે જ રોકાઈ ગયો.”

‘જેરોમ અચાનક મારા ઘરે આવી પહોંચ્યો’

“7 મે 2008ના રોજ સવારે લગભગ 7:30 વાગ્યે મારા ઘરની ડોરબેલ વાગી. મેં દરવાજો ખોલ્યો, તો જોયું કે જેરોમ સામે હતો. તે સીધો અંદર આવી ગયો. નીરજ પણ જાગી ગયો. હું જેરોમની પાછળ-પાછળ અંદર ગઈ.”

“નીરજે મને પૂછ્યું કે, શું જેરોમ મારો બોયફ્રેન્ડ છે? નીરજે તેને ઓળખી લીધો હતો કારણ કે તેણે અમારી તસવીરો જોઈ હતી. નીરજને એ પણ ખબર હતી કે, મારા લગ્ન જેરોમ સાથે થવાના છે.”

“તેના તરત જ બાદ જેરોમે નીરજને મારવાનું શરૂ કર્યું. બંને એકબીજા સાથે લડવા લાગ્યા. હું તેમને રોકી શકી નહીં. બંનેએ મને ધક્કો માર્યો, જેનાથી હું પડી ગઈ. જ્યારે હું ઊભી થઈ ત્યારે મેં જોયું કે જેરોમે મારા રસોડાના ચપ્પુથી નીરજ પર હુમલો કર્યો.”

‘જેરોમે નીરજને મારી નાખ્યો, પછી મારી પર દુષ્કર્મ આચર્યું’

“મેં જેરોમ દ્વારા નીરજને મારવામાં આવી રહેલા ચપ્પુને પકડવાનો પ્રયાસ કર્યો. આ દરમિયાન મારી જમણી હથેળીમાં પણ ઈજા થઈ. જેરોમે ફરી મને ધક્કો માર્યો અને નીરજને ચપ્પુ મારતા રહ્યા. નીરજ ફ્લોર પર પડી ગયો અને જેરોમ તેને મારતા રહ્યા.”

“આ ઘટનાથી હું ચીસો પાડવા લાગી. જેરોમે મારું મોં બંધ કરી દીધું અને મને જાનથી મારી નાખવાની ધમકી આપી. તેમણે મને પથારી પર પછાડી અને મારી સાથે દુષ્કર્મ આચર્યું. તેમણે ક્યારેય ચપ્પુ છોડ્યું નહીં. આ બધું સવારે 8:00 વાગ્યે થયું. તેમણે મને માર માર્યો અને કોઈને આ ઘટના ન કહેવાની ધમકી આપી.”

‘જેરોમે ફરી બાથરૂમમાં મારી સાથે દુષ્કર્મ આચર્યું’

“મેં જેરોમને કહ્યું કે નીરજને હોસ્પિટલ લઈ જઈએ. તેમણે મને કહ્યું કે, નીરજ 4 થી 5 કલાક સુધી મરશે નહીં. તેમણે મને બાથરૂમમાં જઈને નહાવા કહ્યું. આ પછી જેરોમ બાથરૂમમાં આવ્યા અને ફરીથી મારી સાથે દુષ્કર્મ આચર્યું.”

“સવારે 11:00 વાગ્યા પછી જેરોમે મને કહ્યું કે, હું નીરજના કોઈ મિત્રને ફોન કરું અને તેને આ માહિતી આપું કે નીરજ રાત્રે 12:30 વાગ્યે મારા ઘરેથી નીકળી ગયો હતો અને તે પોતાનો મોબાઈલ ફોન મારા ઘરે ભૂલી ગયો છે અને મિત્રને તેનો ફોન લઈ જવા માટે કહું.”

‘જેરોમે મને ચાકુ, પડદા, બેગ અને રૂમ ફ્રેશનર ખરીદવા કહ્યું’

“મેં નીરજના મોબાઈલ ફોનથી નિશાંતને ફોન કર્યો. મેં તે જ કહ્યું, જે એમિલે કહ્યું હતું. મિસ્ટર નિશાંત મારા ઘરે આવ્યા નહીં. આ પછી જેરોમે નીરજના મૃતદેહને ઘસડીને ઘરના બાથરૂમવાળા ભાગમાં લઈ જઈને મૂકી દીધો. પછી જેરોમે મને મલાડના હાઈપરસિટી મોલમાંથી બેગ અને પડદા ખરીદવા કહ્યું. તેમણે એ જણાવ્યું નહીં કે, આ વસ્તુઓ શા માટે મંગાવી રહ્યા છે. તેમણે મને એક ચાકુ અને રૂમ ફ્રેશનર ખરીદવા પણ કહ્યું. મેં આ ચારેય વસ્તુઓ ખરીદી અને મારા ઘરે પાછી આવી.”

“જ્યારે હું આ સામાન ખરીદવા માટે ઘરની બહાર હતી, ત્યારે જેરોમ મોબાઇલ ફોન પર મારી સાથે વાત કરી રહ્યા હતા. હું ઘરે પહોંચી અને તેમને ચાકુ સોંપી દીધું. તેમણે મને બાથરૂમની અંદર ન જવા કહ્યું. તેમણે મને લોહીથી લથપથ હોલ સાફ કરવા કહ્યું.”

મનોરમાં સળગાવવામાં આવ્યા નીરજના મૃતદેહના ટુકડા…

મારિયાએ જણાવ્યું કે, આ પછી તેણે જેરોમના કહેવા પર મિત્ર કિરણ પાસેથી કાર માંગી અને મનોર જઈને લાશના ટુકડા ફેંક્યા અને તેના પર પેટ્રોલ નાખીને આગ લગાડી દીધી અને પાછા ફર્યા. મારિયાનું કાંડુ કપાઈ ગયું હતું, તો ઘરે આવીને જેરોમે બચેલું લોહી સાફ કર્યું. સાંજે મારિયાએ બ્રોકરને ફોન કરીને ઘરમાં રંગકામ કરાવ્યું.

આ બધાંની વચ્ચે 7 મેની રાત્રે સાડા દસ વાગ્યે નિશાંત લાલનો ફોન આવ્યો, જેણે જણાવ્યું કે, તે ફરિયાદ નોંધાવવા પોલીસ સ્ટેશન જઈ રહ્યો છે. નિશાંત બિલ્ડિંગ નીચે આવ્યો, નીરજનો મોબાઇલ લીધો અને મારિયાને લઈને પોલીસ સ્ટેશન ગયા.

મારિયાની કબૂલાત મુજબ, તે અને નીરજ માત્ર મિત્રો હતા. જોકે, તેમની સાથે કોફી શોપમાં મળતા મિત્રોનું કહેવું હતું કે, તેમણે એક ક્લબમાં મારિયા અને નીરજને કિસ કરતા જોયા હતા. પોલીસને શંકા હતી કે, કામ ન મળવાથી નારાજ મારિયાએ એવું માની લીધું હશે કે નીરજે ખોટી આશા આપીને તેની સાથે સંબંધ બનાવ્યો. આ નારાજગીમાં તેણે બોયફ્રેન્ડ જેરોમ દ્વારા નીરજની હત્યા કરાવી.

જોકે, તપાસમાં સ્પષ્ટ હતું કે, 6 મેના રોજ મારિયાએ નીરજને ઘરે બોલાવ્યો ન હતો. તે નીરજ જ હતો, જે મારિયાના ઘરે આવવાની જીદ કરી રહ્યો હતો અને અચાનક ત્યાં પહોંચ્યો.

સુનાવણી દરમિયાન સેશન કોર્ટની બહાર લેવાયેલી મારિયા અને જેરોમનો એક ફોટો.

તપાસમાં સામે આવ્યું કે મારિયા અને નીરજ એકબીજાને પસંદ કરતા હતા. આ જ કારણ હતું કે, નીરજ તે રાત્રે મારિયાના ઘરે જ રોકાયો હતો. જ્યારે કોલ દ્વારા જેરોમને નીરજની હાજરીનો અહેસાસ થયો, ત્યારે તેણે મારિયાને ગુસ્સામાં કહ્યું કે, તે નીરજને ઘરેથી મોકલી દે. મારિયાએ આવું ન કર્યું. બીજી સવારે જ્યારે જેરોમ અચાનક ઘરે પહોંચ્યો, ત્યારે તે નીરજને મારિયાના બેડરૂમમાં જોઈને ગુસ્સે ભરાઈ ગયો અને આક્રોશમાં હત્યાને અંજામ આપ્યો.

કોર્ટમાં 3 વર્ષ સુધી ચાલ્યો નીરજ ગ્રોવર કેસ…

ક્રાઈમ રિપોર્ટર જિગ્ના વોરાએ દિવ્ય ભાસ્કર સાથેની વાતચીતમાં કહ્યું, ‘જેરોમ પોતાની નેવી પર્સનાલિટી સાથે હટ્ટો-કટ્ટો કોર્ટમાં દાખલ થતો હતો. બિલકુલ બની-ઠનીને કોર્ટમાં આવતો હતો. તેના ચહેરા પર ન તો કોઈ ઇમોશન ન એક્સપ્રેશન હતા અને જોઈને એવું લાગતું નહોતું કે તેને આ વાતનો કોઈ પણ પસ્તાવો છે. તેની સાથે તેનો ભાઈ કોર્ટમાં આવતો હતો. અને મારિયા સાથે તેનો ભાઈ અને પિતા આવતા હતા.’

નીરજ ગ્રોવરની હત્યાના 3 વર્ષ પછી કોર્ટે ચુકાદો સંભળાવ્યો. કોર્ટે જેરોમ મેથ્યુને હત્યાનો દોષી માનીને 10 વર્ષની સજા સંભળાવી, જ્યારે મારિયા સુસઈરાજને પુરાવા નષ્ટ કરવાના આરોપમાં માત્ર 3 વર્ષની સજા થઈ.

જેલમાંથી બહાર આવ્યા પછી મારિયાએ કોન્ફરન્સ કરીને પોતાને નિર્દોષ ગણાવી હતી.

3 વર્ષ પછી આવેલા નિર્ણયથી જનતામાં આક્રોશ જોવા મળ્યો…

ચુકાદો આવતા જ નીરજના પરિવાર, ફિલ્મ ઇન્ડસ્ટ્રીના ઘણા લોકોએ તેનો વિરોધ કર્યો અને મુંબઈમાં વિરોધ પ્રદર્શન કર્યું. જોકે, કોર્ટે ચુકાદો યથાવત રાખ્યો. રઝા મુરાદ, નીરજને નજીકથી ઓળખતા હતા. તેમણે ચુકાદો આવ્યા પછી તેની વિરુદ્ધ વિરોધ પ્રદર્શન કર્યું હતું. દિવ્ય ભાસ્કર સાથેની વાતચીતમાં તેમણે કહ્યું, ‘હું આ ઘટનાથી ખૂબ દુખી હતો અને તેનાથી પણ વધુ અફસોસ એ વાતનો હતો કે, કોર્ટે જેરોમ મેથ્યુ અને મારિયાને જે સજા સંભળાવી, તે અપૂરતી હતી. મારિયાને ફક્ત પુરાવા નષ્ટ કરવાના ગુનામાં સજા આપવામાં આવી, જ્યારે તે આ કેસમાં જેરોમ મેથ્યુ જેટલી જ જવાબદાર હતી. અમે તેના વિરોધમાં 3 જુલાઈ 2011ના રોજ એક માર્ચ કાઢી હતી.’

જુલાઈ 2011માં થયેલા વિરોધ પ્રદર્શનમાં રઝા મુરાદ.

વિરોધ પ્રદર્શનમાં પોપ્યુલર કાસ્ટિંગ ડિરેક્ટર વિકાસ ગુપ્તા.

તેમણે આગળ કહ્યું, ‘સાચું કહું તો તેમના મૃત્યુએ આખા દેશને હચમચાવી દીધો હતો. જે રીતે તેમને મારવામાં આવ્યા, તે રીતે તો પ્રાણીઓને પણ મારવામાં આવતા નથી. આ એક ક્રાઈમ ઓફ પેશન હતો. તે સમયે નીરજ ઇન્ડસ્ટ્રીનું મોટું નામ હતા, તેથી બધાં તેમની ગુડ બુક્સમાં રહેવા માંગતા હતા. મારિયાએ પણ તેમને પોતાના ચાર્મથી લલચાવવાનો પ્રયાસ કર્યો અને તેમાં તે ઘણી હદ સુધી સફળ રહી.’

‘મારિયા ખૂબ જ મહત્વાકાંક્ષી છોકરી હતી. અને આવી છોકરીઓ શોર્ટકટ અપનાવીને આગળ વધવાનો પ્રયાસ કરે છે. તેમને લાગે છે કે કોઈની સાથે શારીરિક સંબંધ રાખીને તેઓ આગળ વધી જશે, પરંતુ આવું થતું નથી.’

નીરજ સાથે બાલાજી પ્રોડક્શનમાં કામ કરતા રવિન્દ્ર કહે છે, ‘આના પર સાચું કહું તો, કહેવા માટે શબ્દો નથી. નીરજ સાથે ખૂબ જ દુખદ ઘટના બની. આટલો યુવાન, ઉત્સાહી, શાંત અને સુવક્તા છોકરો હતો તે. આવો અકસ્માત કેવી રીતે થયો? અને આવા બનાવો કેવી રીતે ઓછા થઈ શકે, જ્યારે નીરજના દોષી મારિયા સુસાઈરાજને માત્ર 3 વર્ષની સજા આપીને છોડી દેવામાં આવ્યા? આનાથી મને ખૂબ આઘાત લાગ્યો. મારા માટે આ એક મોટો આઘાત હતો.’

રામ ગોપાલ વર્માએ નીરજ ગ્રોવર હત્યાકાંડ પર ફિલ્મ બનાવી હતી….

નીરજ ગ્રોવરના મૃત્યુના કેટલાક વર્ષો પછી ફિલ્મમેકર રામગોપાલ વર્માએ આ કેસ પર ‘નોટ અ લવ સ્ટોરી’ ફિલ્મ બનાવી હતી. ફિલ્મમાં એક્ટર અજય ગેહીએ નીરજનું, દીપક ડોબરિયાલે જેરોમનું અને માહી ગીલે મારિયાનું પાત્ર ભજવ્યું હતું.

ફિલ્મ ‘નોટ અ લવ સ્ટોરી’ નીરજ ગ્રોવર હત્યાકાંડનો ચુકાદો આવ્યા બાદ 11 ઓગસ્ટ 2011ના રોજ રિલીઝ થઈ હતી.

ફિલ્મનો ક્લાઇમેક્સ સીન તે જ જગ્યાએ શૂટ કરવામાં આવ્યો હતો, જ્યાં નીરજની હત્યા થઈ હતી. અજય ગેહીએ દિવ્ય ભાસ્કર સાથેની વાતચીતમાં કહ્યું હતું કે, ‘અમે તે જ બિલ્ડિંગ, તે જ રૂમમાં ક્લાઇમેક્સ સીનનું શૂટિંગ કરી રહ્યા હતા, જ્યાં આ આખી ઘટના બની હતી. ક્લાઇમેક્સ સીનમાં હું નિર્વસ્ત્ર હતો અને આખો લોહીથી લથપથ હતો. અમને ફક્ત સ્ટોરી કહેવામાં આવી હતી કે આવો સીન છે, પરંતુ આ સીન માટે કોઈ રિહર્સલ થઈ ન હતી. રામુ સરે કહ્યું કે ‘જે કરવાનું મન થાય તે કરો.’ થયું એવું કે આ જ સીનનું શૂટિંગ કરતી વખતે બિલ્ડિંગના કેટલાક લોકો વિરોધ કરવા ઘૂસી આવ્યા હતા અને મને આવી હાલતમાં જોઈને આશ્ચર્યચકિત થઈ ગયા હતા.’

નીરજ ગ્રોવરનું પાત્ર ભજવનાર એક્ટર અજય ગેહી.

અજયે આગળ કહ્યું, ‘વિચારો, સિનેમામાં તેની લોકો પર શું અસર થઈ હશે. હું બસ તે વ્યક્તિના મનોવિજ્ઞાનને પકડી રહ્યો હતો કે તે કેવી રીતે પ્રતિક્રિયા આપતો. જ્યારે બીજી વ્યક્તિ રૂમમાં પ્રવેશે છે, ત્યારે તે દ્રશ્યમાં અમારી વચ્ચે મારામારી થાય છે. હું એક-બે વાર બાથરૂમમાં પડ્યો અને ઈજાઓ પણ થઈ. કરવામાં મુશ્કેલીઓ તો આવી, પણ આ વિચારીને રૂહ કાંપી જાય છે કે આ બધું વાસ્તવિકતામાં થયું હતું.’

(નોંધ: આ સમાચાર નીરજ ગ્રોવર હત્યાકાંડની ચાર્જશીટ, ક્રાઈમ રિપોર્ટર જિગ્ના વોરા, એક્ટર રઝા મુરાદ સાથેની વાતચીત અને દિવ્ય ભાસ્કરના સિનિયર રિપોર્ટર વર્ષા રાયના સંશોધનના આધારે લખવામાં આવ્યા છે.)

લેખક- ઈફત કુરેશી

રિપોર્ટર- વર્ષા રાય

………………………………………………..

પાર્ટ-1, કાસ્ટિંગ ડિરેક્ટર નીરજ ગ્રોવર હીરોઈનના ફલેટમાંથી ગુમઃ એક્ટ્રેસે વાર્તા ઘડતાં પોલીસને શંકા જાગી; પૂછપરછમાં કહ્યું- બોયફ્રેન્ડે હત્યા કરી, લાશ સામે જ મારો રેપ કર્યો

મે 2008ની વાત છે

તે સમયની સૌથી પ્રખ્યાત ક્રાઈમ રિપોર્ટર જિગ્ના વોરાને અમરનાથ ગ્રોવરનો ફોન આવ્યો. તેમણે ગભરાયેલા અવાજમાં કહ્યું, ‘જિગ્નાજી, હું અમરનાથ બોલું છું, મારું બાળક ગુમ થઈ ગયું છે, શું તમે આના પર સ્ટોરી કરશો?’

જીગ્ના, જે મોટા-મોટા કેસની રિપોર્ટિંગ કરતી હતી, તેમના માટે આ કોઈ મોટી વાત નહોતી. તેમણે જવાબ આપ્યો- ‘સર, આવા ઘણા બાળકો ગુમ થઈ જાય છે, પણ આપણે બધા પર સ્ટોરી થોડી કરી શકીએ.’ સંપૂર્ણ સમાચાર વાંચો…

બોલિવૂડ ક્રાઈમ ફાઈલ્સના કેસ 3માં આવતા ગુરુવાર-શુક્રવારે વાંચો પ્રખ્યાત એક્ટ્રેસ પ્રત્યુષા બેનર્જીના મૃત્યુની કહાણી, જેના પરિવારે બોયફ્રેન્ડ પર હત્યાના આરોપ લગાવ્યા હતા.

……………………………………..

બોયફ્રેન્ડને ફાંસી પર લટકતી મળી પ્રત્યુષા બેનર્જી: પરિવારે લગાવ્યા હત્યાના આરોપ, છેલ્લા કોલ રેકોર્ડ્સથી કેસની દિશા બદલાઈ

1 એપ્રિલ 2016

બપોરનો સમય હતો, પ્રત્યુષા બેનર્જીનો લિવ-ઇન પાર્ટનર એક્ટર-પ્રોડ્યુસર કામ પર નીકળ્યો હતો. થોડીવાર પછી જ પ્રત્યુષાએ તેને રડતા રડતા ફોન કર્યો અને કહ્યું- ’10 મિનિટમાં હું મરી જઈશ. હું બોમ્બે વેચાવા નથી આવી.’ રાહુલ વારંવાર કહેતો રહ્યો કે, પાછા ફરીને વાત કરીશ, પરંતુ નશામાં પ્રત્યુષા પોતાના માતા-પિતાને ગાળો આપતી રહી. તે કંઈપણ સાંભળવા તૈયાર નહોતી. પ્રત્યુષાએ રડતા રડતા કહ્યું, ‘હું સ્વાર્થી છું, જિંદગી ખતમ, મને સરળ રસ્તો જોઈએ છે.’

થોડીવાર પછી રાહુલ પાછો ફર્યો. ત્યાં સુધીમાં પ્રત્યુષા ફાંસી પર લટકી ચૂકી હતી.

આખી વાર્તા વાંચો, આવતા ગુરુવાર-શુક્રવારે બોલિવૂડ ક્રાઈમ ફાઈલ્સના કેસ-3માં.