પ્રખ્યાત ટેકનોલોજી કંપની ઓરેકલે ફરી એકવાર મોટા પાયે છટણીની જાહેરાત કરી છે, જેના કારણે કર્મચારીઓમાં હલચલ મચી ગઈ છે. સોમવારે સવારે વહેલી તકે અનેક કર્મચારીઓને તેમની નોકરીમાંથી છૂટા કરવામાં આવ્યા હોવાના ઇમેઇલ્સ મળ્યા હતા. કંપની દ્વારા આ નવો છટણીનો રાઉન્ડ શરૂ કરવામાં આવ્યો છે, જોકે હજુ સુધી આ તબક્કામાં કેટલા કર્મચારીઓ પ્રભાવિત થયા છે તેની સત્તાવાર આંકડાકીય માહિતી કંપની દ્વારા જાહેર કરવામાં આવી નથી. અગાઉના તબક્કામાં ઓરેકલે આશરે 21,000 કર્મચારીઓને નોકરીમાંથી દૂર કર્યા હતા.

સોશિયલ મીડિયા પર દર્દ અને રોષ

નોકરી ગુમાવનાર અનેક કર્મચારીઓએ સોશિયલ મીડિયા પ્લેટફોર્મ્સ જેવા કે લિંક્ડઇન (LinkedIn), રેડિટ (Reddit) અને અન્ય માધ્યમો પર પોતાની વેદના વ્યક્ત કરી છે. ઘણા પ્રભાવિત કર્મચારીઓએ વિડીયો શેર કરીને સવારે અચાનક મળેલા આંચકાજનક સમાચાર વિશે માહિતી આપી છે. અગાઉના રિપોર્ટ્સ મુજબ, 31 મે, 2026 સુધીમાં ઓરેકલે તેના વૈશ્વિક કાર્યબળમાં અંદાજે 13% નો ઘટાડો કર્યો છે, જેના કારણે કંપનીના કર્મચારીઓની સંખ્યા 162,000 થી ઘટીને આશરે 141,000 થઈ ગઈ છે.

AI અને ક્લાઉડ સેવાનું વિસ્તરણ મુખ્ય કારણ

કંપનીના આ પગલા પાછળ આર્ટિફિશિયલ ઇન્ટેલિજન્સ (AI) અને ક્લાઉડ સેવાની વધતી જતી માંગને પહોંચી વળવાનું કારણ સામે આવ્યું છે. ઓરેકલ હાલમાં પોતાના ડેટા સેન્ટર ઇન્ફ્રાસ્ટ્રક્ચરનો વ્યાપ વધારી રહી છે. કંપનીના AI વ્યવસાયમાં ભારે માંગ જોવા મળી રહી છે અને તાજેતરમાં જ કંપનીએ 30 અબજ ડોલરથી વધુના વધારાના AI ક્લાઉડ કરારો પર હસ્તાક્ષર કર્યા છે, જેનાથી ભવિષ્યમાં મોટી આવક થવાની અપેક્ષા છે. આ વ્યૂહાત્મક પરિવર્તન, ખર્ચમાં ઘટાડો કરવા અને કાર્યબળના પુનર્ગઠનના ભાગરૂપે જ ઓરેકલ દ્વારા આ કઠોર પગલાં લેવામાં આવી રહ્યા છે.

આ પણ વાંચોઃ Saudi Arabia પર હુતી બળવાખોરોનો જોરદાર મિસાઇલ હુમલો, અનેક શહેરોમાં હાઇ એલર્ટ