રશિયાના રાષ્ટ્રપતિ વ્લાદિમીર પુતિને બુધવારે બેઇજિંગમાં ચીનના રાષ્ટ્રપતિ શી જિનપિંગ સાથે મુલાકાત કરી. બંને નેતાઓએ ઈરાન યુદ્ધ, યુક્રેન સંકટ, ઊર્જા સુરક્ષા અને દ્વિપક્ષીય સહયોગ સહિત અનેક મુદ્દાઓ પર ચર્ચા કરી.

ચીની સરકારી મીડિયા અનુસાર, જિનપિંગે બેઇજિંગના ગ્રેટ હોલ ઓફ ધ પીપલની બહાર પુતિનનું સ્વાગત કર્યું. બંને નેતાઓ રેડ કાર્પેટ પર સાથે ચાલ્યા અને સૈન્ય બેન્ડે રશિયા અને ચીનના રાષ્ટ્રગાન વગાડ્યા.

વાતચીતની શરૂઆતમાં પુતિને કહ્યું કે બાહ્ય દબાણો છતાં બંને દેશોના આર્થિક અને વ્યૂહાત્મક સંબંધો સતત મજબૂત થઈ રહ્યા છે. જ્યારે જિનપિંગે પણ રશિયા સાથેના સંબંધોને અડગ ગણાવ્યા. તેમણે કહ્યું કે બંને દેશોએ મુશ્કેલ પરિસ્થિતિઓ છતાં રાજકીય વિશ્વાસ અને વ્યૂહાત્મક તાલમેલ સતત ગાઢ બનાવ્યો છે.

જિનપિંગે ઈરાનને લઈને ચાલી રહેલા યુદ્ધ પર પણ ચિંતા વ્યક્ત કરી. તેમણે કહ્યું કે સંઘર્ષ વધારવો યોગ્ય નથી અને યુદ્ધવિરામ જરૂરી છે. સાથે જ વાતચીત ચાલુ રાખવી અત્યંત મહત્વપૂર્ણ છે.

પુતિન અને જિનપિંગની મુલાકાતની તસવીરો…

પુતિન અને જિનપિંગે બુધવારે બીજિંગના ગ્રેટ હોલ ઓફ ધ પીપલમાં મુલાકાત કરી.

પુતિનને ગાર્ડ ઓફ ઓનર આપવામાં આવ્યું.

રશિયન રાષ્ટ્રપતિ પુતિન જિનપિંગને મળવા પોતાની લિમોઝિન કારમાંથી ઉતરતા.

પુતિનના બીજિંગ પહોંચવાના 3 તસવીરો…

બીજિંગ એરપોર્ટ પર રશિયન રાષ્ટ્રપતિ વ્લાદિમીર પુતિનનું રેડ કાર્પેટ સ્વાગત કરવામાં આવ્યું.

બીજિંગ એરપોર્ટ પર પુતિને ચીની અધિકારીઓ સાથે હાથ મિલાવ્યા.

ચીનમાં પુતિને ગાર્ડ ઓફ ઓનર અપાયું.

ચીન અને રશિયા વચ્ચે 40 કરારો પર હસ્તાક્ષર થશે

અલ જઝીરાના અહેવાલ મુજબ, પુતિન આ પ્રવાસમાં મોટા વેપારી અને સરકારી પ્રતિનિધિમંડળ સાથે પહોંચ્યા છે. ક્રેમલિને કહ્યું છે કે બંને દેશો લગભગ 40 કરારો પર હસ્તાક્ષર કરશે. આમાં અર્થતંત્ર, પર્યટન, શિક્ષણ અને ઊર્જા સંબંધિત કરારોનો સમાવેશ થાય છે.

અહેવાલ મુજબ, યુક્રેન યુદ્ધ પછી યુરોપમાં રશિયાનું ગેસ વેચાણ લગભગ બંધ થઈ ગયું છે. આવી સ્થિતિમાં, રશિયા માટે ચીન સાથે ઊર્જા સહયોગ અત્યંત મહત્વપૂર્ણ બની ગયો છે.

બેઠક પહેલાં જારી કરાયેલા વીડિયો સંદેશમાં પુતિને કહ્યું કે રશિયા અને ચીન સાર્વભૌમત્વ અને રાષ્ટ્રીય એકતા જેવા “મુખ્ય હિતો” ના રક્ષણ માટે સાથે મળીને કામ કરશે. તેમણે કહ્યું કે મોસ્કો અને બેઇજિંગ વચ્ચેના ગાઢ વ્યૂહાત્મક સંબંધો વૈશ્વિક સ્થિરતામાં મહત્વપૂર્ણ ભૂમિકા ભજવી રહ્યા છે

પુતિન બોલ્યા- સંબંધો અભૂતપૂર્વ સ્તરે

ચીન પહોંચતા પહેલાં જારી કરાયેલા વીડિયો સંદેશમાં પુતિને કહ્યું કે રશિયા અને ચીનના સંબંધો અભૂતપૂર્વ સ્તરે પહોંચી ગયા છે. તેમણે કહ્યું કે બંને દેશો વચ્ચે વિશ્વાસ, પરસ્પર સમજણ અને સમાન સહયોગનો સંબંધ છે.

પુતિને કહ્યું કે બંને દેશો સાર્વભૌમત્વ અને રાષ્ટ્રીય એકતા જેવા મુદ્દાઓ પર એકબીજાને સમર્થન આપે છે. તેમના મતે, રશિયા અને ચીન રાજકારણ, અર્થતંત્ર અને ઊર્જા સહિત અનેક ક્ષેત્રોમાં સહયોગ વધારી રહ્યા છે.

અમેરિકા-રશિયા વચ્ચે સંતુલન જાળવી રહ્યું ચીન

ટ્રમ્પ પછી હવે પુતિનની મુલાકાતને લઈને જાણકારોનું કહેવું છે કે સતત થઈ રહેલી આ મોટી મુલાકાતો દર્શાવે છે કે ચીન એકસાથે અમેરિકા અને રશિયા બંને સાથે સંબંધો સંતુલિત રાખવાનો પ્રયાસ કરી રહ્યું છે, ખાસ કરીને એવા સમયે જ્યારે યુક્રેન અને ઈરાન સંબંધિત મુદ્દાઓ પર વૈશ્વિક તણાવ પ્રવર્તી રહ્યો છે.

નિષ્ણાતોનું માનવું છે કે ચીન પાસે આ તક છે કે તે એકસાથે અમેરિકા અને રશિયા બંને સાથે વાતચીત કરીને પોતાની વૈશ્વિક ભૂમિકાને મજબૂત દર્શાવે.

પુતિન 40થી વધુ વખત જિનપિંગને મળી ચૂક્યા છે

પુતિન અને શી જિનપિંગ અત્યાર સુધીમાં 40 થી વધુ વખત મુલાકાત કરી ચૂક્યા છે.

પુતિન અને જિનપિંગની મિત્રતા વિશ્વની સૌથી મજબૂત રાજકીય ભાગીદારીઓમાંની એક માનવામાં આવે છે. 2013 માં રાષ્ટ્રપતિ બન્યા પછી, શી જિનપિંગે તેમની પ્રથમ વિદેશ યાત્રા રશિયાની કરી હતી.

જ્યારે પુતિન પણ ઘણી વખત ચીનને તેમની શરૂઆતની વિદેશ યાત્રાઓમાં પ્રાધાન્ય આપતા રહ્યા છે. બંને નેતાઓ સાર્વજનિક મંચો પર એકબીજાને નજીકના મિત્ર અને વ્યૂહાત્મક ભાગીદાર ગણાવી ચૂક્યા છે.

ક્રેમલિન અનુસાર, બંને નેતાઓ વચ્ચે માત્ર ઔપચારિક રાજદ્વારી જ નહીં, પરંતુ સતત અંગત સંવાદ પણ થતો રહ્યો છે. ફેબ્રુઆરી 2026 માં યોજાયેલી વીડિયો બેઠકમાં શી જિનપિંગે પુતિનને ચીન આવવાનું આમંત્રણ આપ્યું હતું, જેને પુતિને તરત જ સ્વીકારી લીધું હતું.

બંને નેતાઓ BRICS, શાંઘાઈ સહયોગ સંગઠન (SCO) અને એશિયા-પ્રશાંત મંચો પર પણ અવારનવાર સાથે જોવા મળે છે. આંતરરાષ્ટ્રીય મામલાઓમાં અમેરિકા અને પશ્ચિમી દેશોના દબાણ સામે રશિયા અને ચીન પોતાને મલ્ટિપોલર વર્લ્ડ ઓર્ડરના સમર્થક તરીકે રજૂ કરતા રહ્યા છે. મલ્ટિપોલર વર્લ્ડ ઓર્ડર એટલે એવી દુનિયા, જ્યાં સત્તા માત્ર એક દેશમાં નહીં પરંતુ ઘણા મોટા દેશોમાં વહેંચાયેલી હોય.

પુતિન અને જિનપિંગ બંને નેતાઓ જાહેર મંચો પર એકબીજાને નજીકના મિત્રો અને વ્યૂહાત્મક ભાગીદારો ગણાવી ચૂક્યા છે.

ચીન-રશિયાના આર્થિક સંબંધો સતત મજબૂત થયા છે

અમેરિકી પ્રભાવને લઈને વહેંચાયેલી ચિંતાને કારણે ચીન અને રશિયાએ છેલ્લા કેટલાક વર્ષોમાં પોતાના સંબંધો ઘણા મજબૂત કર્યા છે. બંને દેશો વચ્ચે સંરક્ષણ, વિદેશ નીતિ, કાયદો અને વ્યવસ્થા તથા આર્થિક વિકાસ જેવા મુદ્દાઓ પર સતત ઉચ્ચ સ્તરીય બેઠકો થતી રહી છે.

યુક્રેન યુદ્ધ શરૂ થયા પછી ચીન અને રશિયા વચ્ચે વેપાર ઝડપથી વધ્યો છે. ચીને રશિયા પાસેથી તેલ, કોલસો અને ગેસની ખરીદી વધારી છે. જ્યારે, ચીન રશિયાને કાર, ઇલેક્ટ્રોનિક્સ અને અન્ય મોટી વસ્તુઓની નિકાસ પણ કરી રહ્યું છે.

સત્તાવાર આંકડાઓ અનુસાર, ગયા વર્ષે બંને દેશો વચ્ચેનો વેપાર 228.1 અબજ અમેરિકી ડોલર સુધી પહોંચી ગયો હતો. રશિયાને તેમાં 21.49 અબજ ડોલરનો ટ્રેડ સરપ્લસ મળ્યો, જે 2024ની સરખામણીમાં 55% વધુ છે.

જોકે, પશ્ચિમી દેશોએ ચીન પર આરોપ લગાવ્યો છે કે તે યુક્રેન યુદ્ધ દરમિયાન રશિયાને આર્થિક ટેકો આપી રહ્યું છે.

પાવર ઓફ સાઇબેરિયા-2 પાઇપલાઇન પર પણ નજર

એવું માનવામાં આવે છે કે પુતિન અને શી જિનપિંગની આગામી બેઠકમાં આ પ્રોજેક્ટ પર પણ ચર્ચા થઈ શકે છે. રશિયા લાંબા સમયથી ‘પાવર ઓફ સાઇબેરિયા-2’ ગેસ પાઇપલાઇન પ્રોજેક્ટને આગળ વધારવાનો પ્રયાસ કરી રહ્યું છે.

આ એક ખૂબ મોટો ગેસ પાઇપલાઇન પ્રોજેક્ટ છે, જેને રશિયા અને ચીન મળીને બનાવી રહ્યા છે. તેનો હેતુ રશિયાના ગેસને સીધો ચીન સુધી પહોંચાડવાનો છે, જેથી બંને દેશો વચ્ચે ઊર્જા સહયોગ વધુ મજબૂત બની શકે.

રિપોર્ટ્સ અનુસાર, આ પાઇપલાઇન દ્વારા રશિયાના યામાલ દ્વીપકલ્પમાંથી દર વર્ષે લગભગ 50 અબજ ક્યુબિક મીટર કુદરતી ગેસ મંગોલિયાના માર્ગે ઉત્તર ચીન મોકલી શકાશે. આટલા ગેસથી 15 થી 20 કરોડ ઘરોની એક વર્ષની જરૂરિયાત પૂરી થઈ શકે છે.

બંને દેશો વચ્ચે પહેલાથી જ એક પાઇપલાઇન ચાલી રહી છે, જેનું નામ પાવર ઓફ સાઇબેરિયા-1 છે. આ રશિયાના પૂર્વીય ભાગમાંથી ચીનને ગેસ પૂરો પાડે છે, જે ડિસેમ્બર 2019 માં શરૂ થઈ હતી. બીજી પાઇપલાઇન રશિયાના પશ્ચિમી ભાગમાંથી ગેસ લાવશે.

ઈરાન સંકટ અને ઓઈલની કિંમતોથી રશિયાને રાહત

અમેરિકા-ઇઝરાયેલ અને ઈરાન વચ્ચે વધતા તણાવની અસર હવે વિશ્વના ઊર્જા બજાર પર પણ દેખાવા લાગી છે. હોર્મુઝ સ્ટ્રેટ લગભગ બંધ થવા જેવી સ્થિતિથી તેલ સપ્લાયને લઈને ચિંતા વધી ગઈ છે. આનાથી દુનિયાભરમાં આર્થિક મંદીનો ખતરો પણ ઘેરાયો છે.

નિષ્ણાતોનું કહેવું છે કે તેલ અને ગેસની કિંમતો વધવાથી હાલમાં રશિયાને થોડો ફાયદો થયો છે. રશિયા વિશ્વના સૌથી મોટા તેલ અને કુદરતી ગેસ ભંડાર ધરાવતા દેશોમાં સામેલ છે. જોકે, યુક્રેન યુદ્ધને કારણે રશિયા હજુ પણ અમેરિકા અને યુરોપિયન દેશોના આર્થિક પ્રતિબંધોનો સામનો કરી રહ્યું છે. આ પ્રતિબંધોની અસર રશિયન અર્થતંત્ર પર સતત બની રહી છે.

——————-

આ સમાચાર પણ વાંચો…

ટ્રમ્પે કહ્યું- ચીન સાથે શાનદાર ટ્રેડ ડીલ થઈ:બંને દેશોને ફાયદો થશે, શી જિનપિંગ સાથે બેઠક કરી; ટ્રમ્પ બેઇજિંગથી રવાના થયા

અમેરિકાના રાષ્ટ્રપતિ ડોનાલ્ડ ટ્રમ્પ શુક્રવારે તેમની ત્રણ દિવસની ચીન મુલાકાત પૂર્ણ કરીને પરત ફર્યા. પ્રવાસના છેલ્લા દિવસે તેમણે ચીનના રાષ્ટ્રપતિ શી જિનપિંગ સાથે છેલ્લી મુલાકાત કરી. આ મુલાકાત બેઇજિંગના ઝોંગનાનહાઈ પરિસરમાં થઈ, જે ચીનના ટોચના નેતૃત્વ માટે સૌથી સુરક્ષિત અને ગુપ્ત સત્તા કેન્દ્ર માનવામાં આવે છે.

બેઠક બાદ ટ્રમ્પે જણાવ્યું કે ચીન સાથે શાનદાર ટ્રેડ ડીલ થઈ છે. તેમણે કહ્યું કે આ કરારોથી અમેરિકા અને ચીન બંનેને ફાયદો થશે. ટ્રમ્પે કહ્યું, “અમે કેટલાક શાનદાર કરારો કર્યા છે, જે બંને દેશો માટે સારા છે.” જોકે તેમણે આ કરારોની વધુ માહિતી શેર કરી નથી. વાંચો સંપૂર્ણ સમાચાર…

દિવ્ય ભાસ્કરને Google પર મનપસંદ સોર્સ બનાવો