ઇન્ટરવ્યૂ દરમિયાન હસીનાએ સ્વીકાર્યું કે બાંગ્લાદેશ પરત ફરવું તેમના માટે જોખમી બની શકે છે. ત્યાંની અદાલતે તેમને મૃત્યુદંડની સજા સંભળાવી છે. તેમ છતાં તેમણે કહ્યું કે તેઓ ડરીને પીછેહઠ નહીં કરે.

તેમણે 1975માં તેમના પિતા શેખ મુજીબુર રહેમાન, માતા, ભાઈઓ અને પરિવારના અનેક સભ્યોની હત્યાનો ઉલ્લેખ કર્યો. હસીનાએ કહ્યું કે 1981માં સૈન્ય શાસન અને ધમકીઓ છતાં તેઓ બાંગ્લાદેશ પરત ફર્યા હતા. તેમણે 21 ઓગસ્ટ 2004ના રોજ થયેલા ગ્રેનેડ હુમલા અને પોતાના પર થયેલા અન્ય હુમલાઓનો પણ ઉલ્લેખ કર્યો.

હસીનાએ કહ્યું કે તેમને જેલ અને રાજકીય દમનનો પણ સામનો કરવો પડ્યો છે. તેમણે કહ્યું કે આજે તેમની સૌથી મોટી ચિંતા પોતાની સુરક્ષા નહીં, પરંતુ બાંગ્લાદેશમાં ન્યાય વ્યવસ્થાની સ્થિતિ છે. તેમણે મૃત્યુદંડને રાજકીય બદલો લેવાની કાર્યવાહી ગણાવી. તેમનું કહેવું છે કે કોઈ વ્યક્તિને પોતાનો પક્ષ રજૂ કરવાની તક આપ્યા વિના સજા સંભળાવવી એ ન્યાય નથી.

78 વર્ષીય શેખ હસીના ઓગસ્ટ 2024માં સરકાર વિરુદ્ધ મોટા આંદોલન બાદ સત્તા પરથી હટી ગયાં હતાં. ત્યારબાદ તેઓ બાંગ્લાદેશ છોડીને ભારત આવી ગયાં. ત્યારથી તેઓ અહીં જ રહી રહ્યાં છે.

દિવ્ય ભાસ્કરને Google પર મનપસંદ સોર્સ બનાવો