દિલ્હી કેપિટલ્સની સૌથી મોટી ચિંતા તેમની સાતત્ય વગરની બેટિંગ છે. કેએલ રાહુલ, ડેવિડ મિલર, ટ્રિસ્ટન સ્ટબ્સ અને સમીર રિઝવીએ સારું પ્રદર્શન કર્યું છે, પરંતુ ઓપનર પથુમ નિસાંકા સારી શરૂઆતને મોટા સ્કોરમાં ફેરવી શકતા નથી. જેના કારણે મિડલ ઓર્ડર પર દબાણ વધી રહ્યું છે.

કેપ્ટન અક્ષર પટેલે બેટિંગમાં વધુ જવાબદારી લેવી પડશે. સમીર રિઝવીએ 6 મેચમાં 150ના સ્ટ્રાઈક રેટથી 209 રન બનાવ્યા છે અને તે ટીમનો ટૉપ સ્કોરર છે. લુંગી એન્ગિડી 7 વિકેટ સાથે સૌથી વધુ વિકેટ લેનાર બોલર છે.

ગત મેચમાં અક્ષર પટેલના કેટલીક કેપ્ટનશીપના નિર્ણયોની ટીકા થઈ હતી. અભિષેક શર્મા સામે તેણે પોતાની જાતે અથવા કુલદીપ યાદવ જેવા ફ્રન્ટલાઈન બોલર્સને બદલે નીતિશ રાણા પાસે બોલિંગ કરાવી હતી, જે મોંઘી સાબિત થઈ. આ ઉપરાંત, દિલ્હીની નબળી ફિલ્ડિંગ પણ હારનું મુખ્ય કારણ રહી છે. ટીમે મહત્વના સમયે સ્ટમ્પિંગ, રન-આઉટ અને કેચ છોડ્યા, જેના કારણે મેચ હાથમાંથી નીકળી ગઈ.

પંજાબ કિંગ્સ સીઝનની સૌથી સંતુલિત ટીમ

પંજાબ કિંગ્સે આ સીઝનનો સૌથી મોટો ટોટલ 254 રન લખનઉ સામે બનાવ્યો છે. ટીમની તાકાત તેમની ઊંડી બેટિંગ લાઈન-અપ છે. ઓપનર પ્રભસિમરન સિંહ (211 રન) અને કેપ્ટન શ્રેયસ અય્યર (208 રન) શાનદાર ફોર્મમાં છે.

પ્રિયાંશ આર્ય અને કૂપર કોનોલીએ પણ ટીમને મજબૂતી આપી છે. કોનોલી 223 રન સાથે ટીમનો ટૉપ સ્કોરર છે. પંજાબની સફળતાનું રહસ્ય એ છે કે તેઓ કોઈ એક બોલર પર નિર્ભર નથી. અર્શદીપ સિંહ, યુઝવેન્દ્ર ચહલ, માર્કો યાન્સેન, વિજયકુમાર વૈશાખ અને ઝેવિયર બાર્ટલેટની ચોકડી સતત વિકેટ લઈ રહી છે. અર્શદીપ સિંહ 6 વિકેટ સાથે ટીમનો ટૉપ વિકેટ ટેકર છે.

પીચ રિપોર્ટ

અરુણ જેટલી સ્ટેડિયમની પીચ IPLમાં બેટિંગ માટે સાનુકૂળ માનવામાં આવે છે. અહીંની સપાટ પીચ અને નાની બાઉન્ડરીના કારણે હાઈ-સ્કોરિંગ મેચ થાય છે. આ પીચ પર IPLની 98 મેચ રમાઈ છે. જેમાંથી 48 વાર પહેલા બેટિંગ કરનારી ટીમ જીતી છે, જ્યારે 50 વાર ચેઝ કરનારી ટીમ જીતી છે. એક મેચ રદ થઈ હતી.

વેધર રિપોર્ટ

25 એપ્રિલે દિલ્હીના અરુણ જેટલી સ્ટેડિયમમાં હવામાન ગરમ રહેવાની શક્યતા છે. વરસાદની સંભાવના નહિવત છે. તાપમાન 30-35°C ની આસપાસ રહેવાની અને ઉમસભર્યું વાતાવરણ રહેવાની આશા છે.

બન્ને ટીમની સંભવિત પ્લેઇંગ-12

પંજાબ કિંગ્સ (PBKS): પ્રભસિમરન સિંહ (વિકેટકીપર), પ્રિયાંશ આર્ય, કૂપર કોનોલી, શ્રેયસ અય્યર (કેપ્ટન), નેહલ વાઢેરા, શશાંક સિંહ, માર્કસ સ્ટોઇનિસ, માર્કો યાન્સેન, ઝેવિયર બાર્ટલેટ, અર્શદીપ સિંહ, યુઝવેન્દ્ર ચહલ અને વિજયકુમાર વૈશાખ.

દિલ્હી કેપિટલ્સ (DC): પથુમ નિસાંકા, કેએલ રાહુલ (વિકેટકીપર), નીતિશ રાણા, સમીર રિઝવી, અક્ષર પટેલ (કેપ્ટન), ડેવિડ મિલર, ટ્રિસ્ટન સ્ટબ્સ, આશુતોષ શર્મા, લુંગી એન્ગિડી, કુલદીપ યાદવ, ટી. નટરાજન અને મુકેશ કુમાર.

દિવ્ય ભાસ્કરને Google પર મનપસંદ સોર્સ બનાવો