ટી-20 વર્લ્ડ કપ વિવાદ બાદ બાંગ્લાદેશની નેશનલ સ્પોર્ટ્સ કાઉન્સિલ (NSC) એ બાંગ્લાદેશ ક્રિકેટ બોર્ડ (BCB) ના અધ્યક્ષ અમિનુલ ઇસ્લામ બુલબુલને હટાવી દીધા છે. એટલું જ નહીં, બોર્ડના અન્ય 6 ડિરેક્ટરોએ પણ રાજીનામું આપી દીધું છે. બોર્ડના કામકાજ સંભાળવા માટે એક એડ-હોક કમિટી બનાવવામાં આવી છે, જેની કમાન પૂર્વ કેપ્ટન તમીમ ઇકબાલને સોંપવામાં આવી છે. આ કમિટી 90 દિવસની અંદર ક્રિકેટ બોર્ડની ચૂંટણી કરાવશે. NSC એ મંગળવારે BCB બોર્ડને ભંગ કરવાનો નિર્ણય લીધો. ત્યારબાદ નવી એડ-હોક કમિટીની રચના કરવામાં આવી, જેનો મુખ્ય ઉદ્દેશ્ય બોર્ડના રોજિંદા કામકાજ સંભાળવા અને નિર્ધારિત સમયમર્યાદામાં ચૂંટણી કરાવવાનો છે. બાંગ્લાદેશે ફાસ્ટ બોલર મુસ્તફિઝુર રહેમાનને IPL માંથી હટાવવાના વિરોધમાં ભારતમાં ટી-20 વર્લ્ડ કપ રમવાનો ઇનકાર કરી દીધો હતો. ત્યારબાદ ICC એ બાંગ્લાદેશની જગ્યાએ સ્કોટલેન્ડને તક આપી હતી. બાંગ્લાદેશના રમતગમત મંત્રાલયે તેની તપાસ કરાવી હતી. એડ-હોક કમિટીમાં 11 સભ્યો સામેલ
તમીમ ઇકબાલને કમિટીના અધ્યક્ષ બનાવવામાં આવ્યા છે. આ કમિટીમાં 11 સભ્યો સામેલ છે. આમાં અથર અલી ખાન, રાશના ઇમામ, મિર્ઝા યાસિર અબ્બાસ, સૈયદ ઇબ્રાહિમ અહેમદ, મિન્હાજુલ આબેદીન નન્નુ, ઇશરાફિલ ખુસરુ, તંજીમ ચૌધરી, સલમાન ઇસ્પહાની, રફીકુલ ઇસ્લામ અને ફહીમ સિંહા સામેલ છે. BCB ના 6 ડિરેક્ટરોએ પણ રાજીનામું આપ્યું
T20 વર્લ્ડ કપ દરમિયાન થયેલા વિવાદ અને બોર્ડની અંદર વધતા અસંતોષને કારણે બુલબુલને હટાવવામાં આવ્યો. આ દરમિયાન છ ડિરેક્ટરોએ પણ રાજીનામું આપી દીધું હતું, જેનાથી બોર્ડ પર દબાણ વધી ગયું. NSC ના ડિરેક્ટર અમીનુલ એહસાને જણાવ્યું કે BCB બોર્ડને ભંગ કરવા અને એડ-હોક કમિટી બનાવવાની જાણકારી ઇન્ટરનેશનલ ક્રિકેટ કાઉન્સિલ (ICC) ને આપી દેવામાં આવી છે. ICC નિયમમાં સરકારી હસ્તક્ષેપની મંજૂરી નથી
ICC ના નિયમો સરકારી હસ્તક્ષેપની મંજૂરી આપતા નથી, પરંતુ 90 દિવસમાં ચૂંટણી કરાવવાની સમય મર્યાદા નક્કી હોવાને કારણે બાંગ્લાદેશ ક્રિકેટ બોર્ડ પર કોઈ પ્રતિબંધની સંભાવના ઓછી માનવામાં આવી રહી છે.