ભારત અને શ્રીલંકાની યજમાનીમાં રમાઈ રહેલા T20 વર્લ્ડ કપને વિવિધ માધ્યમોથી 50 કરોડ લોકોએ જોયો છે. આ માહિતી ઈન્ટરનેશનલ ક્રિકેટ કાઉન્સિલ (ICC)ના ચેરમેન જય શાહે બુધવારે આપી. તેમણે જણાવ્યું કે આ સંખ્યા કોઈપણ વર્લ્ડ કપ કરતાં વધુ છે, જ્યારે હજુ સેમિફાઈનલ અને ફાઈનલની મેચ બાકી છે.

જય શાહે સોશિયલ મીડિયા પ્લેટફોર્મ પર ખુશી વ્યક્ત કરતા જણાવ્યું કે ટુર્નામેન્ટને ગ્લોબલ અને સુલભ બનાવવાનું લક્ષ્ય પૂર્ણ થતું દેખાઈ રહ્યું છે. તેમણે લખ્યું, ‘મને એ જણાવતા ગર્વ થાય છે કે ભારતમાં આ ઇવેન્ટની વ્યુઅરશિપ 50 કરોડને પાર પહોંચી ગઈ છે. જિયો-હોટસ્ટાર પર લાઇવ સ્ટ્રીમિંગ દરમિયાન એક સમયે સૌથી વધુ 6.05 કરોડ દર્શકો એકસાથે મેચ જોઈ રહ્યા હતા.’ જય શાહે આશા વ્યક્ત કરી કે આજ રાતથી શરૂ થઈ રહેલી નોકઆઉટ મેચમાં આ રેકોર્ડ વધુ આગળ વધશે.

ભારત-પાકિસ્તાન વચ્ચેની હાઈ-વોલ્ટેજ મેચે વ્યૂઅરશિપના તમામ જૂના રેકોર્ડ તોડી નાખ્યા હતા. ડિજિટલ પ્લેટફોર્મ પર આ મેચને 16.3 કરોડ યુઝર્સે જોઈ હતી.

2024 વર્લ્ડ કપ અને ચેમ્પિયન્સ ટ્રોફીનો રેકોર્ડ તૂટ્યો આ વખતના આંકડા ગયા વર્ષે અમેરિકા અને વેસ્ટ ઇન્ડીઝમાં યોજાયેલા T20 વર્લ્ડ કપ 2024 કરતાં ઘણા વધારે છે. તાજેતરમાં સમાપ્ત થયેલી 2025 ચેમ્પિયન્સ ટ્રોફીએ પણ મોટી સફળતા મેળવી હતી, જેમાં ફેન્સે 250 બિલિયન મિનિટનો વોચ-ટાઇમ આપ્યો હતો અને ટીવી પર પીક વ્યુઅરશિપ 12.2 કરોડ હતી. જોકે, વર્તમાન વર્લ્ડ કપએ તે આંકડાઓને પણ પાછળ છોડવાનું શરૂ કરી દીધું છે.

જિયો અને હોટસ્ટારની પાર્ટનરશિપનો મળ્યો ફાયદો વ્યુઅરશિપ વધવાનું એક મોટું કારણ ડિજિટલ એક્સેસનું સરળ હોવું છે. આ વખતે રિલાયન્સ અને ડિઝની સ્ટાર (જિયો-હોટસ્ટાર)ના મર્જર પછી આ પહેલી મોટી ICC ઇવેન્ટ છે. ક્રિકેટ ચાહકોને મોબાઇલ અને ટીવી પર હાઇ-ક્વોલિટી સ્ટ્રીમિંગની સુવિધા મળી રહી છે, જેનાથી વ્યુઅરશિપમાં વધારો થયો છે. ખાસ કરીને ભારતની મેચ દરમિયાન ટ્રાફિકમાં જબરદસ્ત વધારો જોવા મળ્યો.

ટુર્નામેન્ટનો આખરી પડાવ આજથી શરૂ 7 ફેબ્રુઆરીથી શરૂ થયેલી આ ટુર્નામેન્ટ હવે તેના આખરી અને સૌથી રોમાંચક પડાવ પર છે. ગ્રુપ સ્ટેજ અને સુપર-8ની મેચ પછી હવે આજથી સેમિફાઈનલની જંગ શરૂ થશે. ટુર્નામેન્ટની ફાઈનલ મેચ 8 માર્ચે અમદાવાદમાં રમાશે. ICCને આશા છે કે ફાઈનલ મેચના દિવસે વ્યૂઅરશિપના જૂના તમામ ગ્લોબલ રેકોર્ડ તૂટી શકે છે.

દિવ્ય ભાસ્કરને Google પર મનપસંદ સોર્સ બનાવો