વ્હાઇટ હાઉસે અમેરિકી રાષ્ટ્રપતિ ડોનાલ્ડ ટ્રમ્પનો નવો મેડિકલ રિપોર્ટ શુક્રવારે જાહેર કર્યો છે. 14 દિવસમાં 80 વર્ષના થનારા ટ્રમ્પનું સ્વાસ્થ્ય ઉત્તમ છે.

મેડિકલ રિપોર્ટ અનુસાર, ટ્રમ્પ હાલમાં કોલેસ્ટ્રોલ અને હૃદય માટે કુલ ત્રણ દવાઓ લઈ રહ્યા છે. આમાંથી બે દવા, ‘રોસુવાસ્ટેટિન’ અને ‘એઝેટિમિબ’ કોલેસ્ટ્રોલ નિયંત્રણ માટે છે. જ્યારે એક લો-ડોઝ ‘એસ્પિરિન’ હૃદય સંબંધિત બીમારીઓથી બચાવવા માટે આપવામાં આવી રહી છે.

વ્હાઇટ હાઉસના ડોક્ટર શોન પી. બારબાબેલાએ જણાવ્યું કે ટ્રમ્પનું સ્વાસ્થ્ય શાનદાર છે અને તેઓ રાષ્ટ્રપતિ પદની જવાબદારીઓ નિભાવવા માટે સંપૂર્ણપણે ફિટ છે. રિપોર્ટમાં એમ પણ કહેવામાં આવ્યું કે તેમનું કાર્ડિયાક, ફેફસાં અને ન્યુરોલોજીકલ સ્વાસ્થ્ય મજબૂત છે.

ડોનાલ્ડ ટ્રમ્પનો મેડિકલ રિપોર્ટ.

22 નિષ્ણાત ડોકટરોએ ટ્રમ્પની તપાસ કરી

ટ્રમ્પનો આ મેડિકલ ચેકઅપ મંગળવારે વોલ્ટર રીડ નેશનલ મિલિટરી મેડિકલ સેન્ટરમાં થયો હતો. વ્હાઇટ હાઉસ અનુસાર આ દરમિયાન 22 નિષ્ણાત ડોકટરોએ તેમની તપાસ કરી હતી. તેમાં સીટી સ્કેન, હાર્ટ ઇમેજિંગ, કેન્સર સ્ક્રીનિંગ અને ઘણા પ્રિવેન્ટિવ ટેસ્ટનો સમાવેશ થતો હતો.

રિપોર્ટમાં જણાવાયું છે કે ટ્રમ્પનું કોગ્નિટિવ અને ફિઝિકલ પર્ફોર્મન્સ ઉત્તમ છે. ડોકટરે એમ પણ લખ્યું કે ટ્રમ્પનું વ્યસ્ત શેડ્યૂલ, સતત મીટિંગ્સ, પબ્લિક ઇવેન્ટ્સ અને શારીરિક પ્રવૃત્તિઓ તેમના એકંદર સ્વાસ્થ્યને ટેકો આપે છે.

ડોકટરે વજન ઘટાડવાની સલાહ આપી

મેડિકલ રિપોર્ટ મુજબ ટ્રમ્પનું વજન હવે 238 પાઉન્ડ એટલે કે લગભગ 108 કિલો છે. એપ્રિલ 2025ની અગાઉની મેડિકલ તપાસમાં તેમનું વજન 224 પાઉન્ડ એટલે કે લગભગ 101.6 કિલો હતું. ટ્રમ્પની લંબાઈ 6 ફૂટ 3 ઇંચ જણાવવામાં આવી છે.

ડોક્ટર બારબાબેલાએ ટ્રમ્પને વજન ઘટાડવા હેલ્ધી ડાયટ અપનાવવા અને વધુ શારીરિક પ્રવૃત્તિ કરવાની સલાહ આપી છે. રિપોર્ટમાં કહેવામાં આવ્યું છે કે તેમને કાર્ડિયોવેસ્ક્યુલર હેલ્થ અને વજન ઘટાડવા અંગે પ્રિવેન્ટિવ કાઉન્સેલિંગ પણ આપવામાં આવ્યું હતું.

વારંવાર લોકો સાથે હાથ મિલાવવાને કારણે હાથ પર પડેલા નિશાન

ટ્રમ્પના હાથ પર દેખાતા નિશાનોને લઈને છેલ્લા ઘણા મહિનાઓથી સવાલો ઉઠી રહ્યા છે. મેડિકલ રિપોર્ટમાં આ અંગે પણ સ્પષ્ટતા કરવામાં આવી છે. ડોક્ટર બારબાબેલા મુજબ, વારંવાર લોકો સાથે હાથ મિલાવવા અને એસ્પિરિન લેવાને કારણે તેમના હાથ પર હળવા નિશાન પડી રહ્યા છે.

જોકે, કેટલાક સ્વતંત્ર ડોકટરોએ અગાઉ આ દાવા પર સવાલ ઉઠાવ્યા છે. તેમનું કહેવું હતું કે નિશાન ટ્રમ્પના ડાબા હાથ પર વધુ દેખાયા હતા, જ્યારે તેઓ જમણા હાથથી કામ કરે છે.

રિપોર્ટમાં એમ પણ કહેવામાં આવ્યું હતું કે ટ્રમ્પના પગના નીચેના ભાગમાં હળવો સોજો હતો, જે ગયા વર્ષની સરખામણીમાં સુધર્યો છે. જોકે, આ અંગે વધુ માહિતી આપવામાં આવી નથી.

ટ્રમ્પના હાથ પર દેખાતા નિશાનોને લઈને છેલ્લા ઘણા મહિનાઓથી સવાલો ઉઠી રહ્યા હતા. હવે ડોકટરોએ તેનું કારણ જણાવ્યું છે.

ટ્રમ્પ રાષ્ટ્રપતિ પદ સંભાળનારા સૌથી વૃદ્ધ નેતાઓમાં સામેલ

ડોનાલ્ડ ટ્રમ્પ 14 જૂને 80 વર્ષના થશે. તેઓ અમેરિકી ઇતિહાસમાં રાષ્ટ્રપતિ પદ સંભાળનારા સૌથી વૃદ્ધ નેતાઓમાં સામેલ છે. છેલ્લા એક વર્ષમાં તેમના પગમાં સોજો, કેટલાક કાર્યક્રમોમાં ઊંઘમાં દેખાવા અને ગરદન પર દેખાયેલા ફોલ્લીઓને લઈને સતત ચર્ચા થતી રહી છે.

વ્હાઇટ હાઉસ પહેલાં જણાવી ચૂક્યું છે કે ટ્રમ્પને ‘ક્રોનિક વેનસ ઇન્સફિશિયન્સી’ની સમસ્યા છે. આ ઉંમર સંબંધિત એક સામાન્ય બીમારી છે, જેમાં પગમાં બ્લડ સર્ક્યુલેશન પ્રભાવિત થાય છે. માર્ચમાં તેમની ગરદન પર દેખાયેલા રેશને લઈને પણ કહેવામાં આવ્યું હતું કે તે સ્કિન ટ્રીટમેન્ટને કારણે હતો.

આ દરમિયાન ટ્રમ્પ અને તેમના સહયોગી સતત એવો દાવો કરતા રહ્યા છે કે તેમને કોઈ ગંભીર સ્વાસ્થ્ય સમસ્યા નથી. ટ્રમ્પે હંમેશા પોતાની સ્ટેમિના અને માનસિક ક્ષમતાને પોતાની જાહેર છબીનો મહત્વનો ભાગ ગણાવ્યો છે.

પહેલાં ઘણી વાર રાષ્ટ્રપતિ ટ્રમ્પની ગરદન પર પણ નિશાન જોવા મળ્યા હતા.

મેડિકલ રિપોર્ટમાં ‘કાર્ડિયાક એજ’નો પણ ઉલ્લેખ

વ્હાઇટ હાઉસના મેડિકલ રિપોર્ટમાં વધુ એક અસામાન્ય બાબતનો સમાવેશ કરવામાં આવ્યો હતો. ડોક્ટર બાર્બાબેલાએ દાવો કર્યો હતો કે ઇલેક્ટ્રોકાર્ડિયોગ્રામના આધારે ટ્રમ્પની ‘કાર્ડિયાક એજ’ (એટલે કે હૃદયની વાસ્તવિક ઉંમર) તેમની વાસ્તવિક ઉંમર કરતાં 14 વર્ષ ઓછી છે. કેટલાક સ્વતંત્ર ડોકટરોએ તેને મેડિકલ રિપોર્ટમાં સામેલ કરવાને અસામાન્ય ગણાવ્યું હતું.

બીજી તરફ, ટ્રમ્પે મંગળવારે ચેકઅપ પછી પોતાના સોશિયલ મીડિયા પ્લેટફોર્મ ટ્રુથ સોશિયલ પર લખ્યું હતું, “વોલ્ટર રીડ મિલિટરી મેડિકલ સેન્ટરમાં મારું 6 મહિનાનું ફિઝિકલ પૂરું થયું. બધું જ બિલકુલ પરફેક્ટ નીકળ્યું.”

જોકે, ઘણા ડોકટરોએ 6 મહિનાના ફિઝિકલના દાવા પર સવાલો ઉઠાવ્યા હતા. હાર્વર્ડ મેડિકલ સ્કૂલના પ્રોફેસર અને ડોક્ટર ઇશાની ગાંગુલીએ કહ્યું કે સામાન્ય રીતે સંપૂર્ણ ફિઝિકલ ટેસ્ટ વર્ષમાં એકવાર થાય છે. છ મહિનાના ફોલોઅપને સામાન્ય રીતે ફિઝિકલ કહેવામાં આવતું નથી.

દિવ્ય ભાસ્કરને Google પર મનપસંદ સોર્સ બનાવો