આજની ભાગદોડભરી જીવનશૈલી સ્વાસ્થ્ય સમસ્યાનું કારણ બનવા લાગી છે. યુવાનોનો સ્ક્રીન ટાઈમ, તો ડેસ્ક જોબ્સના કારણે કલાકો સુધી બેસવું અને અયોગ્ય ખાનપાનના કારણે શરીરમાં કોલેસ્ટ્રોલ વધવું એ એક સામાન્ય પરંતુ અત્યંત ગંભીર સમસ્યા બની ગઈ છે. લોહીમાં વધતું ‘ખરાબ કોલેસ્ટ્રોલ’ (LDL) ધમનીઓમાં જમા થઈને તેને બ્લોક કરે છે, જેનાથી હાર્ટ એટેક અને હૃદય રોગનું જોખમ અનેકગણું વધી જાય છે. પરંતુ દવા લીધા વગર દિનચર્યામાં નાનો ફેરફાર કરી કોલેસ્ટ્રોલ નિયંત્રણ કરી શકાય છે. તમારી દરરોજ યોગ્ય રીતે ચાલવાની આદત કોલેસ્ટ્રોલને કુદરતી રીતે નિયંત્રિત કરશે.

કોલેસ્ટ્રોલ ઘટાડવા ચાલવું બેસ્ટ ઉપાય આરોગ્ય નિષ્ણાત

ફિટનેસ અને પોષણ નિષ્ણાતો માને છે કે કોલેસ્ટ્રોલનું સ્તર સુધારવા માટે ‘ચાલવું’ એ સૌથી શ્રેષ્ઠ, સસ્તો અને આસાન ઉપાય છે. ચાલવાની કસરત કરી તમે માત્ર ૧ થી ૩ મહિનામાં તમારા કોલેસ્ટ્રોલ લેવલમાં મોટો સુધારો લાવી શકે છે. પરંતુ સવાલ એ થાય કે દરરોજ કેટલું ચાલવું જોઈએ. જો તમારું કામ સતત બેસી રહેવાનું છે, તો પહેલા જ દિવસથી દોડવાનું કે ભારે કસરત કરવાની જરૂર નથી.

નાના બદલાવથી શરૂઆત કરો, નિષ્ણાત

આરોગ્ય નિષ્ણાતના જણાવ્યા મુજબ કોલેસ્ટ્રોલ ઘટાડવા રોજિંદા જીવનમાં નાના બદલાવથી શરૂઆત કરવી જોઈએ. જેમકે, ઑફિસ કે મૉલ જતી વખતે તમારી કારને થોડી દૂર પાર્ક કરો જેથી થોડું ચાલવા મળે. તેમજ ઑફિસમાં કામ કરતી વખતે ‘સ્ટેન્ડિંગ ડેસ્ક’નો ઉપયોગ કરો. ઘરે આવ્યા પછી તરત જ સોફા પર બેસી જવાને બદલે ઘરની આસપાસ થોડી મિનિટો ફરો. કારણ કે સીધા ઊભા રહેવાથી સ્નાયુઓ સક્રિય થાય છે, જે શરીરમાં ‘સારા કોલેસ્ટ્રોલ’ (HDL) ને વધારે છે અને ખરાબ કોલેસ્ટ્રોલને ઘટાડે છે.

દરરોજ કેટલું ચાલવું જોઈએ

કોલેસ્ટ્રોલ ઘટાડવા નિયમિત ચાલવું જરૂરી છે. તમે અઠવાડિયામાં ૫ થી ૬ દિવસ, રોજની ૩૦ મિનિટ ચાલવાનો ટાર્ગેટ રાખો. તમે આ ૩૦ મિનિટને બે ભાગમાં વહેંચી શકો છો—સવારે ૧૫ મિનિટ અને સાંજે ૧૫ મિનિટ. યાદ રાખો, માત્ર ૨ મિનિટનું ટૂંકું વૉકિંગ પણ શરીર માટે ફાયદાકારક છે. ઘીરેધીરે પોતાના ટાર્ગેટ વધારતા રહો. એટલે કે આ અઠવાડિયે તમે રોજ ૫,૦૦૦ પગલાં ચાલો છો, તો આવતા અઠવાડિયે ૫,૫૦૦ પગલાંનો ટાર્ગેટ રાખો. સપાટ જમીનના બદલે સહેજ ઢાળ વાળા રસ્તા પર ચાલો. ‘નોર્ડિક વૉકિંગ પણ કરી શકો છો.

ચાલવું કેમ જરૂરી, શરીરમાં થાય છે આ બદલાવ

જ્યારે તમે ચાલો છો, ત્યારે શરીરમાં ખાસ ઉત્સેચકો સક્રિય થાય છે. આ ઉત્સેચકો લોહીમાંથી નકામા ‘ખરાબ કોલેસ્ટ્રોલ’ (LDL) ને શોષીને તેને લીવર (યકૃત) સુધી પહોંચાડે છે. લીવર આ કોલેસ્ટ્રોલને ચરબી પચાવનારા ‘પિત્ત’ (Bile) માં ફેરવી નાખે છે અથવા તેને શરીરમાંથી બહાર ફેંકી દે છે. જો શારીરિક પ્રવૃત્તિ ન કરવામાં આવે તો આ LDL રક્તવાહિનીઓની દીવાલો પર જમા થઈને તેને સાંકડી બનાવી દે છે.

આ પણ વાંચો : 2 જૂન કી રોટી, શું ખરેખર આનો જૂન મહિના સાથે કોઈ સંબંધ છે? જાણો સત્ય!