સાઉદી અરેબિયાએ તેના રિયલ એસ્ટેટ સેક્ટરને વિદેશીઓ માટે ખોલી દીધું છે. ‘સાઉદી પ્રોપર્ટીઝ’ નામના નવા ડિજિટલ પોર્ટલ દ્વારા હવે વિદેશી નાગરિકો, કંપનીઓ અને રોકાણકારો ત્યાં પ્રોપર્ટી ખરીદવા માટે ઓનલાઈન અરજી કરી શકે છે. આ પગલું જાન્યુઆરી 2026માં લાગુ થયેલા વિદેશી રિયલ એસ્ટેટ માલિકી કાયદા હેઠળ લેવામાં આવ્યું છે. આ બદલાવથી લગભગ 24 લાખ ભારતીયોને સૌથી વધુ ફાયદો થઈ શકે છે જેઓ સાઉદી અરેબિયામાં રહે છે અને કામ કરે છે. અત્યાર સુધી ભારતીયો ફક્ત ભાડે મકાન લઈ શકતા હતા. પરંતુ નવી વ્યવસ્થા હેઠળ તેઓ ત્યાં પ્રોપર્ટીના માલિક પણ બની શકે છે. રિયલ એસ્ટેટ જનરલ ઓથોરિટી (રેગા) એ જણાવ્યું કે ‘સાઉદી પ્રોપર્ટીઝ’ પોર્ટલ સંપૂર્ણપણે ડિજિટલ છે. તેના દ્વારા તમે તમારી પાત્રતા ચકાસી શકો છો, અરજી કરી શકો છો અને તમારી અરજીની સ્થિતિ પણ ટ્રેક કરી શકો છો. જોકે, બે પવિત્ર શહેરો મક્કા અને મદીના માટે નિયમો હજુ પણ કડક છે. આ બંને શહેરોમાં પ્રોપર્ટીની માલિકી ફક્ત સાઉદી કંપનીઓ અને મુસ્લિમ પ્રવાસીઓ/નાગરિકોને જ આપવામાં આવશે. સાઉદી અરેબિયાનું રિયલ એસ્ટેટ માર્કેટ (2025) 6.8 લાખ કરોડ રૂપિયાનું છે. 2034 સુધીમાં તે લગભગ 13 લાખ કરોડ થવાનો અંદાજ છે. જાણો નવા નિયમો હેઠળ સાઉદી અરેબિયામાં પ્રોપર્ટી ખરીદવા માટે કેવી રીતે રોકાણ કરી શકાય છે ભારતીય ખરીદદારો માટે કેટલી મોટી તક? રિયલ એસ્ટેટ કન્સલ્ટન્સી ફર્મ એનરોક ગ્રુપના સીઈઓ (રિટેલ) અનુજ કેજરીવાલે જણાવ્યું હતું કે, ‘કિંગડમમાં ભારતીય પ્રવાસીઓની મોટી વસ્તી છે. નવા નિયમોને કારણે સાંસ્કૃતિક રીતે પરિચિત હોવા અને ભાડાની સારી માગને કારણે ખાસ કરીને પ્રાઇમ અને બિઝનેસ-લિંક્ડ લોકેશન્સમાં ભારતીય ખરીદદારોની રુચિ ઘણી વધી શકે છે.’ દુબઈથી કેટલું અલગ છે? કેજરીવાલના મતે, સાઉદીનું બજાર નવું હોવાને કારણે ઘણા ખરીદદારો હજુ પણ દુબઈ જેવા ચકાસાયેલા બજારોને પ્રાધાન્ય આપી શકે છે. દુબઈનું બજાર જૂનું અને ભારતીયો માટે જાણીતું છે. શરૂઆતમાં ભારતીયોની માગ થોડી મર્યાદિત પણ રહી શકે છે કારણ કે નિયમો હજુ બની રહ્યા છે. જોકે, સાઉદીમાં વિઝન 2030 હેઠળ મોટા શહેરી અને પર્યટન પ્રોજેક્ટ ચાલી રહ્યા છે. લાંબા ગાળે કેપિટલ ગ્રોથની અપેક્ષા છે. ‘સાઉદી પ્રોપર્ટીઝ’ પોર્ટલ પર કઈ-કઈ સુવિધાઓ મળશે? આ પોર્ટલ વિદેશી ખરીદદારો માટે ‘વન-સ્ટોપ શોપ’ છે, જ્યાં તેઓ ઉપલબ્ધ પ્રોપર્ટી અને રોકાણની તકો બ્રાઉઝ કરી શકે છે, પોતાની પાત્રતા ચકાસી શકે છે, માલિકી હકના કાયદાકીય રસ્તાઓની જાણકારી મેળવી શકે છે. અરજી કરવાની સાથે જ સ્ટેટસ પણ લાઇવ ટ્રેક કરી શકે છે. કયા-કયા શહેરોમાં વિદેશી પ્રોપર્ટી ખરીદી શકાય છે? મક્કા, મદીનાને છોડીને સમગ્ર સાઉદી અરબના વિકસિત વિસ્તારો, નિયોમ, રેડ સી પ્રોજેક્ટ, દીરિયા અને અલ-ઉલા જેવા ગીગા-પ્રોજેક્ટ્સમાં વિદેશી રોકાણકારો પ્રોપર્ટી ખરીદી શકશે. કોણ ખરીદી શકે છે? સાઉદી અરેબિયામાં રહેતા ભારતીયો અને વિદેશમાં રહેતા NRI, બંને અરજી કરી શકે છે. સાઉદીમાં રહેતા લોકો રેસિડેન્સી નંબરથી સીધી અરજી કરી શકશે, વિદેશમાં રહેતા NRIને પહેલા સાઉદી દૂતાવાસમાંથી ડિજિટલ ID લેવી પડશે. શું કંપની દ્વારા રોકાણ કરી શકાય છે? ભારતીય કંપનીઓ ‘ઇન્વેસ્ટ સાઉદી’ પ્લેટફોર્મ પર રજીસ્ટ્રેશન અને નેશનલ યુનિફાઇડ નંબર લીધા પછી અરજી કરી શકે છે. હાલમાં રોકાણ કરવું જોઈએ? આ સમયે અમેરિકા-ઈરાન યુદ્ધને કારણે રિયલ એસ્ટેટ મંદીનો સામનો કરી રહ્યું છે. માર્ચ 2025માં દુબઈમાં રહેણાંક વેચાણ લગભગ 20% ઘટી ગયું હતું. આવી સ્થિતિમાં, સાઉદી અરેબિયા એક નવો વિકલ્પ બનીને ઉભરી રહ્યું છે.