અત્યાર સુધી વોટ્સએપ પર કોઈ નવા વ્યક્તિ સાથે વાત કરવા માટે પોતાનો મોબાઈલ નંબર આપવો જરૂરી હતો. પરંતુ હવે આવું નહીં થાય. મેટાની માલિકીના વોટ્સએપે યુઝરનેમ ફીચર લોન્ચ કરવાની જાહેરાત કરી છે. આ પછી લોકો પોતાનો મોબાઈલ નંબર જણાવ્યા વિના પણ માત્ર યુઝરનેમ દ્વારા ચેટ કરી શકશે. કંપનીએ 29 જૂનથી દુનિયાભરમાં યુઝરનેમ રિઝર્વેશન શરૂ કરી દીધું છે. જોકે આ સુવિધા બધા યુઝર્સને એકસાથે નહીં મળે. આવનારા કેટલાક મહિનાઓમાં તેને ધીમે ધીમે બધા દેશોમાં રોલ આઉટ કરવામાં આવશે. જ્યારે આ ફીચર તમારા વિસ્તારમાં ઉપલબ્ધ થશે, ત્યારે વોટ્સએપની અંદર નોટિફિકેશન મળશે. વોટ્સએપના સીઆઓ કુણાલ શાહે X પર પોસ્ટ કરીને જણાવ્યું કે તેમણે ફીચર જાહેર થાય તે પહેલા જ પોતાનું યુઝરનેમ રિઝર્વ કરી લીધું છે. તેમણે લોકોને પણ જલદી પોતાનું મનપસંદ યુઝરનેમ લેવા અપીલ કરી. આ નવા ફીચરથી શું બદલાશે? યુઝરનેમ ફીચર આવ્યા બાદ ચોક્કસ પરિસ્થિતિઓમાં તમારો ફોન નંબર આપમેળે દેખાશે નહીં. આમાં સામેલ છે: જ્યારે તમને મોટા ગ્રુપ ચેટમાં જોડવામાં આવે છે. જ્યારે તમે પહેલી વાર કોઈને મેસેજ કરો છો. આ ફેરફારથી તમારો ફોન નંબર ખાનગી (પ્રાઈવેટ) રહે છે. જ્યારે તમે પોતે તેને શેર કરવા માંગશો ત્યારે જ તે દેખાશે.
વોટ્સએપ યુઝરનેમ ફીચર સંબંધિત સવાલ- જવાબો વોટ્સએપ યુઝરનેમ ફીચર શા માટે લાવી રહ્યું છે? વોટ્સએપનું કહેવું છે કે ઘણીવાર લોકો કોઈ નવી વ્યક્તિ સાથે વાતચીત કરવા માંગે છે, પરંતુ પોતાનો મોબાઇલ નંબર શેર કરવા માંગતા નથી. જેમ કે કોઈ નેટવર્કિંગ ઇવેન્ટમાં મળેલ વ્યક્તિ, નવા ક્લાસમેટ, પડોશી અથવા બાળકોના સ્કૂલ/સ્પોર્ટ્સ ગ્રુપના અન્ય વાલીઓ સાથે વાત કરતી વખતે પ્રાઇવસી જાળવી રાખવી જરૂરી હોય છે. આવી સ્થિતિમાં હવે મોબાઇલ નંબરની જગ્યાએ ફક્ત યુઝરનેમ શેર કરી શકાશે. યુઝરનેમ બનાવવાના નિયમો શું છે? યુઝરનેમ 3 થી 35 કેરેક્ટરનું હશે. તેમાં ફક્ત a-z (સ્મોલ અંગ્રેજી અક્ષરો), 0-9 (અંકો), ડોટ (.) અને અંડરસ્કોર (_) નો ઉપયોગ કરી શકાશે. દરેક યુઝરનેમ સંપૂર્ણપણે યુનિક હશે. જરૂર પડ્યે તેને બદલી, હટાવી અથવા અપડેટ કરી શકાશે. શું મોબાઇલ નંબર સંપૂર્ણપણે છુપાઈ જશે? હા, પરંતુ ફક્ત તે લોકો માટે જેઓ પહેલીવાર તમારો સંપર્ક કરશે. જો તમે યુઝરનેમ સેટ કર્યું હશે, તો નવી વ્યક્તિ તમારો મોબાઇલ નંબર જોઈ શકશે નહીં. જોકે વોટ્સએપ એકાઉન્ટ બનાવવા અને ઉપયોગ કરવા માટે મોબાઇલ નંબર પહેલાની જેમ જ જરૂરી રહેશે. જે લોકો પાસે તમારો નંબર પહેલેથી સેવ છે, તેઓ પહેલાની જેમ જ તમારી સાથે ચેટ કરી શકશે. શું કોઈ પણ યુઝરનેમ સર્ચ કરીને મને શોધી શકશે? ના. વોટ્સએપ કોઈ સાર્વજનિક યુઝરનેમ ડિરેક્ટરી બનાવશે નહીં. કંપની કોઈ અન્ય યુઝરને તમારું યુઝરનેમ સૂચવશે (Suggest) પણ નહીં. કોઈ વ્યક્તિ તમને ત્યારે જ મેસેજ મોકલી શકશે, જ્યારે તેને તમારું સાચું યુઝરનેમ ખબર હશે. યુઝરનેમ કી શું છે? વોટ્સએપ યુઝરનેમ કી નામનું એક નવું વૈકલ્પિક (Optional) સુરક્ષા ફીચર પણ લાવી રહ્યું છે. જો યુઝર તેને ચાલુ કરે છે, તો પહેલીવાર મેસેજ મોકલનાર વ્યક્તિને પહેલા આ Key દાખલ કરવી પડશે. આ પછી જ ચેટ શરૂ થઈ શકશે. યુઝર જ્યારે ઈચ્છે ત્યારે આ કી બદલી પણ શકશે. તેનો ઉદ્દેશ્ય સ્પામ અને અનિચ્છનીય મેસેજ ઘટાડવાનો છે. ઇન્સ્ટાગ્રામ અને ફેસબુક યુઝરનેમનું શું થશે? ક્રિએટર્સ, બિઝનેસ અને સંસ્થાઓ જ્યાં શક્ય હશે ત્યાં, તેમના ઇન્સ્ટાગ્રામ અને ફેસબુક જેવું જ યુઝરનેમ વોટ્સએપ પર પણ લઈ શકશે. જાણીતી હસ્તીઓ અને મોટી બ્રાન્ડ્સના કેટલાક યુઝરનેમ પહેલેથી જ સુરક્ષિત (Reserved) રાખવામાં આવશે, જેથી કોઈ નકલી એકાઉન્ટ બનાવીને તેમની ઓળખનો દુરુપયોગ ન કરી શકે. જૂની ચેટ્સ અને કોન્ટેક્ટ્સ પર શું અસર પડશે? વર્તમાન ચેટ્સ, કોન્ટેક્ટ્સ અને ગ્રુપ્સ પહેલાની જેમ જ કામ કરશે. જે લોકો પાસે પહેલેથી તમારો નંબર છે, તેમના માટે કંઈ બદલાશે નહીં. એન્ડ-ટુ-એન્ડ એન્ક્રિપ્શન, બ્લોક અને રિપોર્ટ જેવા તમામ સુરક્ષા ફીચર્સ પહેલાની જેમ જ કામ કરતા રહેશે. આ ફીચરનો સૌથી મોટો ફાયદો શું થશે? નવા લોકો સાથે વાત કરવા માટે મોબાઇલ નંબર શેર કરવો પડશે નહીં. યુઝર્સની પ્રાઇવસી પહેલા કરતા વધુ મજબૂત બનશે. સ્પામ અને અનિચ્છનીય મેસેજ ઘટાડવામાં મદદ મળશે. ક્રિએટર્સ અને બિઝનેસ માટે Meta ના અલગ-અલગ પ્લેટફોર્મ પર એક જેવી ડિજિટલ ઓળખ જાળવી રાખવી સરળ બનશે.