દેશમાં મહિલાઓ માત્ર ડિજિટલ પેમેન્ટ કરવા પૂરતી સીમિત નથી. તેઓ બિઝનેસ ઓપરેશન્સ, લોન અને રોકાણ માટે પણ ડિજિટલ પ્લેટફોર્મનો ઉપયોગ વધારી રહી છે. ડીબીએસ બેંક ઇન્ડિયા અને ડેલૉય ઇન્ડિયાના અભ્યાસ મુજબ, 84% મહિલા ઉદ્યોગસાહસિકો માટે ડિજિટલ પેમેન્ટ ટૂલ્સ સૌથી લોકપ્રિય નાણાકીય પ્લેટફોર્મ બની ગયા છે. આ સર્વેમાં દેશભરની 1,342 ઉદ્યોગસાહસિક, હાઈ નેટવર્થ એટલે કે શ્રીમંત અને ગ્રામીણ કાર્યકારી મહિલાઓને સામેલ કરવામાં આવી હતી. આમાંથી 72% મહિલા ઉદ્યોગસાહસિકો અને 77% શ્રીમંત મહિલાઓ યુપીઆઈનો ઉપયોગ કરે છે. જોકે, પેમેન્ટથી આગળ વધીને હવે 38% મહિલાઓ લોન પ્લેટફોર્મ્સ અને 29% રોકાણ માટે બ્રોકરેજ પ્લેટફોર્મ્સનો ઉપયોગ કરી રહી છે. શહેરી વિસ્તારમાં યુપીઆઈનું પ્રભુત્વ છે, પરંતુ ગ્રામીણ કાર્યકારી મહિલાઓમાં હજુ પણ 77% સાથે રોકડ સૌથી પસંદગીનો વિકલ્પ છે. ગ્રામીણ મહિલાઓમાં યુપીઆઈનો ઉપયોગ 54% છે. મહિલા ઉદ્યોગસાહસિકોમાં 42% ડેબિટ કાર્ડ અને 36% ક્રેડિટ કાર્ડનો ઉપયોગ કરે છે. ધનિક મહિલાઓમાં યુપીઆઈ પછી 53% સાથે ક્રેડિટ કાર્ડ બીજું સૌથી મોટું માધ્યમ છે. સર્વે મુજબ, 65% મહિલાઓ કર્મચારીઓના પગાર અને કોન્ટ્રાક્ટર પેમેન્ટ પર ખર્ચ કરે છે. 53% મહિલાઓ ડિજિટલ માર્કેટિંગ, બ્રાન્ડિંગ અને નવા ગ્રાહકો ઉમેરવા પર પૈસા ખર્ચી રહી છે. આ ઉપરાંત 37% મહિલાઓ સોફ્ટવેર અને ટેકનિકલ ટૂલ્સ ખરીદવા પર ખર્ચ કરે છે. ડિજિટલ પ્રવાહ વચ્ચે સુરક્ષા સૌથી મોટી ચિંતા છે. લગભગ 62% મહિલા ઉદ્યોગસાહસિકો ડેટા સિક્યોરિટીને અત્યંત મહત્વપૂર્ણ માને છે. જ્યારે 46% ને જટિલ યુઝર ઇન્ટરફેસને કારણે એપ ચલાવવામાં મુશ્કેલી પડે છે. આ ઉપરાંત 46% મહિલા ઉદ્યોગસાહસિકોએ ડિજિટલ ફ્રોડનો સામનો કર્યો છે. શહેરી કામ કરતી મહિલાઓમાં ક્રેડિટ કાર્ડ લોકપ્રિય શહેરી વિસ્તારમાં કમાણી કરતી મહિલાઓ વચ્ચે ક્રેડિટ કાર્ડ એક સામાન્ય નાણાકીય સાધન બની રહ્યું છે. અડધી મહિલા ઉદ્યોગસાહસિકો તેમના પર્સનલ ક્રેડિટ કાર્ડનો વારંવાર ઉપયોગ કરે છે. તેઓ દરરોજ અથવા અઠવાડિયામાં ઘણી વખત તેનો ઉપયોગ કરે છે. વધુ કમાણી કરતી ઉદ્યોગસાહસિકોમાં તેનો ઉપયોગ ખૂબ ઝડપથી વધે છે. મહિલા ઉદ્યોગસાહસિકો અને શ્રીમંત મહિલાઓમાંથી 65% એ હોટેલ ઑફર્સ, એર માઇલ્સ, લાઉન્જ એક્સેસ અને ટ્રાવેલ ઇન્શ્યોરન્સ જેવા રિવૉર્ડ્સને સૌથી વધુ પસંદ કર્યા.